Ղազախստանի մուսուլմանների միության (ՂՄՄ) հասարակական կազմակերպությունները և Կենտրոնական Ասիայի Մարդու իրավունքների մուսուլմանական կոմիտեն մտադիր են խնդրանքով դիմել Ղազախստանի վարչապետ Քարիմ Մասիմովին և կրթության ու գիտության նախարար Բախիթջան Ժումագուլովին, որպեսզի նրանք խորհուրդ տան շրջանավարտներին չընդունվել ռուսական համալսարաններ: Այս մասին են հայտնում տեղի ԶԼՄ-ները` հղում անելով ՂՄՄ-ի մամլո ծառայությանը:
Հասարակական կազմակերպությունները կարծում են, որ հանցավորության բարձր մակարդակը և Ռուսաստանում ազգայնական տրամադրությունների աճը մեծ վտանգ են ներկայացնում արտասահմանցի ուսանողների, այդ թվում՝ նաև ղազախների կյանքի և առողջության համար, չնայած երկու երկրների պատմական անցյալին:
Ռուսաստանի բարձրագույն կրթական հաստատություններում ուսում ստանալու համար այլ արգելքների շարքում են ահաբեկչության աճը, «ռասիզմի անկեղծ քարոզն ու այլատյացությունը»:
Բարձրաստիճան պաշտոնյաներին դիմելու առիթ է հանդիսացել Ռուսաստանի Գուբկինի անվան նավթի և գազի պետական համալսարանի 24-ամյա ղազախ ուսանող Էրնար Ալիևի սպանությունը, որը տեղի է ունեցել հունիսի 26-ի գիշերը:
