Ֆրանսիայի նախագահ Ֆրանսուա Օլանդի Թուրքիա կատարելիք այցի նախօրեին փարիզաբնակ տասնյակ հայեր ցույց են անցկացրել Փարիզում՝ իրենց բողոքը հայտնելով Եվրամիությանը Անկարայի անդամակցության դեմ, հայտնում է armenian.irib.ir-ը:
Ցույցերը տեղի են ունեցել Փարիզի կենտրոնական փողոցներում և Էյֆելյան աշտարակին հարակից տարածքում: Պաստառներին գրված է եղել՝ «ԵՄ-ին Թուրքիայի անդամակցությունը նշանակում է հերքել 1915թ. իրականացված Հայոց ցեղասպանությունը»:
Ֆրանսիայի հայկական կազմակերպությունների խորհրդի (CCAF) փոխնախագահ Ֆրանկ Մուրադ Փափազյանն ասել է. «Մենք Ֆրանսիայի նախագահի Թուրքիա կատարելիք այցի նախօրեին հավաքվել ենք այստեղ` դատապարտելու այդ երկիրը»:
Նրա խոսքով՝ իրենց նպատակն է Օլանդին կոչ անել արդարության ձայնը հասցնել Թուրքիա: «Ինչ խոսք, լավ է, որ երկու երկրները հարաբերություն ունենան, բայց պետք է նշենք, որ Թուրքիան անհրաժեշտ չափանիշներ չունի ԵՄ-ին անդամակցելու համար: Օլանդը նաև պետք է Թուրքիային հիշեցնի, որ մեկ տարի է մնացել Հայոց ցեղասպանության 100-ամյակին»,- ասել է Ֆրանսիայի հայկական կազմակերպությունների խորհրդի փոխնախագահը:
Նա նաև շնորհակալություն է հայտնել ասորիներին, կիպրոսցիներին, հույներին ու քրդերին՝ ցույցին միանալու համար:
