Ինչպես հաղորդում է France Presse գործակալությունը, ևս 24 երկիր հայտարարել են ՄԱԿ-ում Պաղեստինի անկախությունը պաշտպանելու մասին, որի քվեարկությունը տեղի է ունենալու այս տարվա սեպտեմբերին:
Այս մասին հայտարարել է իշխող «Ֆաթհ» կուսակցության արտաքին կապերի պատասխանատու Նաբիլ Շաաթը, որն անցած շաբաթ այս հարցը քննարկելու համար ժամանել էր Երևան: «Նրանք (ճանաչող երկրները.– 1in.am) տեղեկացրել են մեզ այդ մասին, և մենք ակնկալում ենք, որ դա տեղի կունենա առաջիկա մի քանի շաբաթների ընթացքում»,- ասել է Շաաթը՝ ավելացնելով, թե ակնկալվում է, որ Հայաստանը կլինի առաջինը:
Շաաթը նաև ասել է, թե իրենք հույս ունեն, որ դրանց թվում կլինեն նաև եվրոպական 10 երկրները (Իսպանիան, Շվեդիան և այլն), որոնք կճանաչեն Պաղեստինը, նաև տեղեկացրել է, որ երեկ պաղետինյան ղեկավարությունը որոշում է կայացրել հետ չկանգնել ՄԱԿ-ում Պաղեստինի անկախության հարցը քվեարկելուց:
Իսրայելցիները զգուշացրել են այս քայլի վտանգավորության մասին. այն կարող է հանգեցնել արյունահեղության: Այս մասին մասնավորապես ասել է Իսրայելի Քնեսեթի արտաքին հարաբերությունների և պաշտպանության հանձնաժողովի նախագահ Շաուլ Մոֆազը. «Միակողմանի հռչակումը (Պաղեստինի անկախության.– 1in.am) կարող է պաղեստինցիներին հանել փողոցներ՝ բողոքի ցույցերի, և, Աստված ների, դա կարող է հանգեցնել հակամարտության»,- ասել է Մոֆազը: