Ուկրաինայի վարչապետ Նիկոլայ Ազարովն ասել է, որ Ուկրաինան համագործակցել է ՆԱՏՕ-ի հետ և կհամագործակցի ապագայում՝ չնայած ունի արտաբլոկային կարգավիճակ: ՆԱՏՕ-ի հետ համագործակցությունը թույլ կտա երկրին արդիականացնել զինված ուժերը: «Մենք համագործակցել ենք ՆԱՏՕ-ի հետ, և համագործակցելու ենք, չնայած մեր արտաբլոկային կարգավիճակին»,- ասել է Ազարովը ուկրաինական հեռուստատեսությամբ հեռարձակվող Tkachenko.ua հաղորդմանը:
«Մեր ռազմական տեխնիկան հնացել է, և այդ պատճառով ռազմական առումով այդպիսի զարգացած կառույցի հետ համագործակցությունը կարող է բարձրացնել մեր զինված ուժերը: Մենք համատեղ զորավարժություններ ենք անցկացնում նաև Ռուսաստանի, Բելառուսի հետ: Մենք ոչ մի գաղափարական նախապաշարմունք չունենք»,- ասել է Ազարովը, որին ցիտում է Interfax գործակալությունը:
Ազարովը նաև հույս է հայտնել, որ նախկին վարչապետ Տիմոշենկոյի և մնացած նախկին պաշտոնյաների դեմ դատական քննությունը կլինի «եվրոպական» և թափանցիկ:
Հիշեցնենք, որ անցած շաբաթ ռուսական մամուլում հայտնվել էին հրապարակումներ, գաղտնի փաստաթղթեր, համաձայն որոնց՝ Ուկրաինան պատրաստվում է սերտ համագործակցություն սահմանել Հյուսիսատլանտյան դաշինքի հետ:
