Երեկ անդրադառնալով «Սասնա ծռեր» կուսակցության անդամների՝ խորհրդարանը 1.5-2 տարի աշխատելու հայտարարությանը՝ վարչապետի պաշտոնակատարն ասել էր, որ ընտրվող խորհրդարանը լինելու է լեգիտիմ և գործելու է իր լիարժեք ժամկետներում, եթե ՀՀ քաղաքացիներն այլ բան չորոշեն: «Դուք որոշել եք, որ Ձեզ իրավունք է տրված խորհրդարանի, երբեմն նույնիսկ մարդկանց կյանքի չափերը: Ես Ձեզ ասում եմ՝ հանկարծ չշշկռվեք, սա ձեզ համար Սերժ Սարգսյանի թուլամորթ և թուլակամ իշխանությունը չէ: Մեր ժպիտները և քաղաքավարությունը որևէ մեկը չհամարձակվի մեկնաբանել որպես թուլություն»,- նշել էր նա:
Այսօր Ժիրայր Սեֆիլյանի թիմը հայտարարությամբ արձագանքել է Նիկոլ Փաշինյանի երեկվա ելույթին՝ պնդելով, որ վարչապետն իր խոսքում «կատարել է անհիմն պնդումներ, օգտագործել է սպառնալիքներ և վիրավորական ենթատեքստ ունեցող արտահայտություններ», ու դարձյալ շեշտել, որ խորհրդարանական ընտրությունները երկու տարվա ընթացքում անհրաժեշտություն են՝ նոր Սահմանադրություն, ԸՕ և «Կուսակցությունների մասին» օրենք ընդունելուց հետո։
Ինքնին հասկանալի է, որ այստեղ խնդիրը արտահերթ ընտրությունները չեն, որոնց անհրաժեշտության կամ բացառման մասին երկուստեք պնդումներն էլ համարժեք չեն, որովհետև գոնե այս պահին հնարավոր չէ կանխատեսել, թե առաջիկա մեկ-երկու տարում ինչպիսի զարգացումներ տեղի կունենան Հայաստանում և դրա շուրջ։
Սակայն Փաշինյանի ու «Սասնա ծռերի» վեճն ավելի խորքային է, ու արտահերթ ընտրությունների թեման դրա ընդամենը այսբերգն է։ Փաշինյանի պատկերացմամբ՝ հեղափոխությունը կամ առնվազն դրա քաղաքական մասը դեկտեմբերի 9-ին վերջանում է, որից հետո պետք է ձեռնամուխ լինել որակապես նոր համակարգի ստեղծմանը, ինչը հնարավորություն կտա բովանդակություն հաղորդել նոր Հայաստանին, ձևավորել դրա քաղաքական, տնտեսական, ինստիտուցիոնալ հիմքերը։ Պատահական չէ, որ դեռ խորհրդարանական ընտրություններից առաջ՝ Երևանի նորընտիր քաղաքապետ Հայկ Մարությանի ինագուրացիայի ժամանակ, Նիկոլ Փաշինյանը հանդես եկավ ծրագրային ելույթով, որի առանցքը բարիկադների ապամոնտաժումն էր։ Վարչապետի ելույթը հենց հեղափոխության ավարտի ու հասարակության և քաղաքական դաշտի տարբեր սեգմենտների երկխոսության համար նոր բանաձև գտնելու անհրաժեշտության մասին էր։ Դրան էին միտված նաև Փաշինյանի մի քանի կադրային նշանակումներ, որոնք, իհարկե, միանշանակ չընդունվեցին հասարակության կողմից։
Այնուամենայնիվ, դատելով Նիկոլ Փաշինյանի երեկվա ելույթից, նա հետամուտ է նրան, որպեսզի դեկտեմբերի 9-ին ավարտվի, այսպես կոչված, անցումային ժամանակաշրջանը։ Ի վերջո, խորհրդարանական ընտրությունները ժամկետային առումով առաջ բերվեցին հենց այն պատճառաբանությամբ, որպեսզի կանխատեսելի կայունության միջավայրում կառավարությունը հնարավորություն ունենա զբաղվելու երկարաժամկետ ծրագրերի իրականացմամբ, իսկ ներդրողները շահագրգռվածություն ցուցաբերեն Հայաստանի հանդեպ։
Ժիրայր Սեֆիլյանի թիմն ըստ էության առաջարկում է, այսպես կոչված, պերմանենտ հեղափոխության ճանապարհը, որի հաջորդ թիրախը դառնալու են արդեն ոչ թե քրեաօլիգարխիան, որը հուսանք՝ դեկտեմբերի 9-ին ջախջախվելու է, այլ Երրորդ հանրապետության քաղաքական, սահմանադրական, արժեքային հիմքերը։
«Ծռերի» համար նոր Սահմանադրության ընդունումը կենսական, արմատական պահանջ է, որի միջոցով նրանք ձգտում են արխիվացնել Երրորդ հանրապետությունը։ Նման ռադիկալ պահանջներ հնչում են ոչ միայն հայկական հեղափոխությունից հետո, այլ նաև նման նախադեպեր եղել են Վրաստանում և Ուկրաինայում։ Վրացական հեղափոխությունից հետո Միխեիլ Սաակաշվիլիին հաջողվեց ստեղծել նոր, արդյունավետ համակարգ՝ լուսանցքայնացնելով մարգինալներին։ Նույնը չի կարելի ասել ուկրաինական հեղափոխությունների պարագայում, որոնք ոչ միայն չեն ավարտվել կայուն համակարգերի ստեղծմամբ, այլև լեգիտիմացրել են տարբեր մարգինալ խմբերի ու նաև ռևանշիստական խմբերի գործունեությունը։
Ահա այս վտանգավոր ճանապարհն է, որ մերժում է Նիկոլ Փաշինյանը։
