ՀՀ ԱԺ նախագահ Արա Բաբլոյանը նոյեմբերին 27-ին ընդունել է Սիրիայի Արաբական Հանրապետության Ժողովրդական ժողովի Սիրիա-Հայաստան պատգամավորական բարեկամական խմբի ղեկավար Նորա Արիսյանի գլխավորած պատվիրակությանը, որը մեր երկիր է այցելել Սևծովյան տնտեսական համագործակցության խորհրդարանական վեհաժողովի 52-րդ լիագումար նստաշրջանի աշխատանքներին մասնակցելու նպատակով:
Այս մասին հայտնում են ԱԺ լրատվության և հանրության հետ կապերի վարչությունից: Արա Բաբլոյանը, ողջունելով հյուրերին անդրադարձել է երկու ժողովուրդների պատմական անցյալին ու ավանդույթներին, տարբեր ձևաչափերով արդյունավետ համագործակցությանը:
Խոսելով տարածաշրջանային խնդիրներից` խորհրդարանի ղեկավարը նշել է, որ Հայաստանը կարևորում է Սիրիայի ու նրա քաղաքացիների անվտանգությունը և հույս հայտնել, որ շուտով խաղաղություն ու կայունություն կհաստատվի:
Անդրադառնալով երկու երկրների միջև հարաբերությունների առավել խորացմանն ու զարգացմանը` Ազգային ժողովի նախագահն անհրաժեշտ է համարել խորհրդարանականների ակտիվ շփումներն ու փոխայցերը:
Հյուրերը, բարձր գնահատելով երկկողմ արդյունավետ փոխգործակցությունը, շնորհակալություն են հայտնել Հայաստանին դժվար պահերին իրենց կողքին լինելու ու սիրիացի ժողովրդին սատարելու համար:
Պատվիրակության անդամները Սիրիա-Հայաստան հարաբերությունների զարգացման գործում բարձր են գնահատել հայ համայնքի դերը, որը Սիրիայի հասարակության անբաժան մասն է և մեծ ներդրում ունի երկրի զարգացման գործում:
