Հունվարի 24-ին ոստիկանության պետ, գեներալ-լեյտենանտ Վլադիմիր Գասպարյանը խորհրդակցություն անցկացրեց ոստիկանության Շիրակի մարզային վարչությունում:
Ներկայացնելով վարչության նորանշանակ պետ, ոստիկանության գնդապետ Վարդան Նադարյանին՝ Վլադիմիր Գասպարյանը նշել է Շիրակի ոստիկանների աշխատանքում տեղ գտած թերությունները:
Վլադիմիր Գասպարյանը նախանշել է այն ուղղությունները, որոնցով պետք է ընթանա ոստիկանության Շիրակի մարզային վարչության ու ենթակա ստորաբաժանումների գործունեության բարեփոխումը, մասնավորապես՝ մասնագիտական պարտականությունների լիարժեք իրականացում, կատարողական կարգապահության բարձրացում, հասարակություն-ոստիկանություն կապի իրական ամրապնդում, անհանդուրժողականություն կլանային մտածողության ու իրենց օրենքից վեր դասողների հանդեպ, և ամենագլխավորը՝ անձնակազմի բարոյահոգեբանական մթնոլորտի առողջացում:
Վլադիմիր Գասպարյանը կարևորել է ոստիկանի հեղինակության, ոստիկանի պատվախնդրության և արժանապատվության գերակա նշանակությունը ոչ միայն հանցավորության դեմ պայքարի ու հասարակական կարգի պահպանման, այլև հասարակության հավատին ու վստահությանն արժանանալու, բուն հանրային մթնոլորտի առողջացման գործում:
Անդրադառնալով ոստիկանությունում ընթացող բարեփոխումներին և ընդգծելով, որ համակարգի վերափոխումն ու բարոյական նորոգումն այլընտրանք չունեն՝ ոստիկանության պետը նշել է այն խոչընդոտները, որոնք դանդաղեցնում են այդ ընթացքը:
Խորհրդակցությունից հետո ոստիկանության պետը սպառիչ պատասխաններ է տվել լրագրողների հարցերին և անդրադարձել մասնավորապես Գյումրիում տիրող մթնոլորտի որոշակի դրսևորումներին:
Այնուհետև Վլադիմիր Գասպարյանը հանդիպում է ունեցել մարզպետարանում: Մասնակցել են Շիրակի մարզպետ Ֆելիքս Ցոլակյանը, Գյումրու քաղաքապետը և համայնքների ղեկավարներ:
Ոստիկանության պետը ներկայացրել է իր այցի նպատակը, ապա անդրադարձել ոստիկանության խնդիրներին ու ծրագրերին, որոնց իրագործումը պահանջում է ինչպես տեղական ինքնակառավարման մարմինների, այնպես էլ հանրության աջակցությունը:
Փաստելով անպատժելիության մտայնությունն արմատախիլ անելու հրատապ անհրաժեշտությունը՝ Վլադիմիր Գասպարյանը կարևորել է իրական քաղաքացիական հասարակության ձևավորման խնդիրը՝ բարեպաշտ, օրինահարգ, սրտացավ քաղաքացիների հասարակություն, որի համար անհանդուրժելի են անտարբերությունը, ապաքաղաքացիական կեցվածքը, տեղայնությունը, զանազան կեղծ հասկացությունների տուրք տալը, ինչն այսօր, ցավոք, կա և հաճախ խանգարում է ոստիկանությանը՝ կատարելու իր խնդիրը:
Հանդիպման մասնակիցներին համատեղ աշխատանքի կոչ անելով՝ ոստիկանության պետն ընդգծել է, որ 2014 թվականը լինելու է բեկումնային տարի:
Շիրակի մարզպետ Ֆելիքս Ցոլակյանը շնորհակալություն հայտնեց ոստիկանության պետ Վլադիմիր Գասպարյանին այցի, առարկայական ու շահագրգիռ հանդիպման համար և հավաստիացրեց, որ ոստիկանության, տեղական ինքնակառավարման մարմինների ու մարզի բնակչության փոխգործակցությունը կկայանա ու կտա ցանկալի արդյունք:
