«Չելսի»-ի գլխավոր մարզիչ Ժոզե Մոուրինյոն հաստատել է, որ իսպանացի կիսապաշտպան Խուան Մատան մոտ է «Մանչեսթեր Յունայթեդ» տեղափոխվելուն, ինչպես նաև ընդգծել է, որ 25-ամյա ֆուտբոլիստի տրանսֆերի համար կատարված առաջարկը բավարարում է ակումբին:
«Մենք Խուանին թույլ ենք տվել մեկնել բուժզննման «Մանչեսթեր Յունայթեդ»-ում: Վաղ թե ուշ ամեն ինչ պարզ կդառնա: Մատան հիանալի ֆուտբոլիստ է: Մենք ստացել ենք առաջարկ, որը համապատասխանում է այս մակարդակի ֆուտբոլիստին: Սա լավ տեղափոխություն է Մատայի և Պրեմիեր լիգայի համար, իսկ առաջարկը լիովին բավարարում է ակումբին:
Մենք Խուանին մաղթում ենք հաջող ելույթներ: Նա կկարողանա ցուցադրել իր լավագույն որակները: Եթե երկրպագուները հիասթափված են Մատայի հեռանալու հետ կապված, ապա ես կարող եմ ընդգծել, որ մենք նույնպես հիասթափված ենք: Բայց պետք է հարցին նայել այլ տեսանկյունից: Երկրպագուներն ուրախ կլինեի՞ն, եթե մենք նրան չտայինք երջանիկ լինելու հնարավորություն»,- ասել է պորտուգալացի մասնագետը:
