«Առաջին լրատվական»-ի զրուցակիցն է Հայաստանի կառուցողական կուսակցության նախագահ, քաղաքագետ Անդրիաս Ղուկասյանը։
-Պարոն Ղուկասյան, ինչո՞ւ ձեր հիմնադրած կուսակցությունը որոշեց չմասնակցել արտահերթ խորհրդարանական ընտրություններին, քաղաքական ի՞նչ պատճառներ կան։
–Մենք որոշեցինք չմասնակցել, որովհետև դեռ ավարտին չէր հասել մեր պետական գրանցման գործընթացը։ Մենք չուզեցինք գրանցվելու ձևական ճանապարհով գնալ և գերադասեցինք ժամանակի ընթացքում հզորացնել մեր կառույցները։ Գուցե ավելի դանդաղ, բայց ավելի արմատական ձևով կաշխատենք, չենք գտնում, որ մեր չմասնակցելը ինչ-որ խնդիր է։ Նորաստեղծ կուսակցության համար այս Ընտրական օրենսգրքով բավականին բարդ է մասնակցել ընտրություններին։ Ուստի եկանք այն եզրակացության, որ և՛ հանրության, և՛ մեզ համար ավելի լավ կլինի ամրապնդել մեր կուսակցությունն ու պատրաստվել մյուս քաղաքական գործընթացներին։
-Այսինքն` խնդիրը զուտ տեխնիկակա՞ն է, և քաղաքական որևէ պատճառ չկա։
–Ո՛չ, քաղաքական որևէ պատճառ չկա։
-Իսկ մասնակցող ուժերի մեջ ունե՞ք նախընտրություններ։
–Մենք որոշել ենք, որ այս ընտրություններում պետք է մեզ վրա վերցնենք դիտորդական առաքելությունը և քաղաքացիական հանրության հետ միասին ընտրություններին այդ կարգավիճակով կմասնակցենք։
-Կարծում եք՝ այս ընտրություններին գաղափարական, ծրագրային պայքարի ականատե՞սը կլինենք։
–Այս ընտրությունների քաղաքական նշանակությունը շատ մեծ է, որովհետև վերացվում է ռևանշիզմի համար մինչև օրս գոյություն ունեցող հնարավորությունը։ Այսինքն՝ լեգիտիմ իշխանության ձևավորումը բացառում է ռևանշիզմի ու հակահեղափոխականության որևէ դրսևորում։ Այդ առումով ընտրությունները շատ կարևոր են և ընտրությունների քաղաքական նշանակությունը դրանում է կայանում։ Իսկ այն հանգամանքը, որ ընտրությունների արդյունքը կանխատեսելի է բոլորի համար՝ այն, որ «Իմ քայլը» հաղթելու է, ևս մի առանձնահատկություն է և մի մեծ պատասխանատվություն է դնում այդ դաշինքի ուսերին՝ ներկայացնել բազմակողմանի լուրջ հանրային ծրագիր։
Հանրությունը սպասում է մի այնպիսի նախընտրական ծրագրի, որը որ իսկապես հանրության համար բիզնեսի, հանրային մյուս սպասումների ուղեցույց կլինի, այսինքն՝ այն, ինչ ժողովուրդը սպասում է հետընտրական շրջանում։ Այդ առումով «Իմ քայլը» դաշինքի ծրագիրը մեծ նշանակություն ունի։
-Իսկ 30 տոկոսը կազմող ընդդիմության դեպքո՞ւմ։
-Մյուս կուսակցությունների ընտրական ծրագրերը, հավանաբար, կունենան լրացուցիչ դերակատարություն, այսինքն՝ մարդկանց համար կարող է պարզապես գաղափարներ ու մտքեր լինեն հետագայում խթան հանդիսանալու համար։ Բայց գլխավորապես հետաքրքրելու են «Իմ քայլը» դաշինքի խոստումները, դրանք են քաղաքական դաշտում որոշիչ լինելու։
