Մամուլում շրջանառվող տեղեկությունների համաձայն՝ այսօր Փարիզում կկայանա Հայաստանի և Ադրբեջանի ԱԳ նախարարների հանդիպումը՝ ԵԱՀԿ Մինսկի խմբի համանախագահների մասնակցությամբ: Հետաքրքրական է, թե այս օրերին հայ-ադրբեջանական զորքերի շփման գծում լարվածության և օրերս ադրբեջանական կողմի դիվերսիոն գործողությունների ֆոնին ինչ դրական արդյունք կարող է ամրագրվել նախարարների հանդիպման ընթացքում:
«Առաջին լրատվական»-ի հետ զրույցում Ֆրանսիայի Ռազմական հետազոտությունների հիմնադրամի փորձագետ, վերլուծաբան Կայծ Մինասյանն ասաց, որ ԵԱՀԿ Մինսկի խմբի գործընթացի շրջանակում կազմակերպվող հանդիպումներին այլընտրանք չկա, ուստի, նրա համոզմամբ, հայկական կողմը պետք է մասնակցի հանդիպմանը, բանակցությունները պետք է շարունակվեն, քանի որ ադրբեջանցիներն են ամեն ինչ անում, որպեսզի բանակցությունները տապալվեն կամ այդ լարվածությամբ ճնշում են գործադրում ՀՀ-ի նկատմամբ, որպեսզի Հայաստանը որդեգրի զիջողական կեցվածք: Փորձագետը հիշեցրեց, որ միշտ էլ կարևոր հանդիպումներից առաջ բախումներ, սադրանքներ և դիվերսիոն գործողություններ են կազմակերպվում հայ-ադրբեջանական հակամարտության շփման գծում, և սա այդ տրամաբանության շարունակությունն է ու, բարեբախտաբար, Հայաստանի զորքերը և իշխանություններն ավելի սառնարյուն կեցվածք են դրսևորում, որը ճիշտ է:
«Վաղվա հանդիպումից սպասելիքներ չպետք է ունենալ, միայն ցույց տալ, թե երկու կողմերը պատրաստ են բանակցությունները շարունակելուն, բայց ադրբեջանցիները ճնշում կգործադրեն և, անշուշտ, հայաստանցիները կցանկանան ցույց տալ, որ այդ պայմաններում դժվար է բանակցություններ շարունակել, բայց ստիպված են շարունակել, քանի որ ՀՀ-ի համար ԵԱՀԿ Մինսկի խմբի ձևաչափը շատ կարևոր է և առաջնային, իսկ Ադրբեջանի համար այն պետք է տապալվի: Ուստի Հայաստանը պետք է շահագրգռված լինի այդ բանակցությունների շարունակականությամբ»,- ասաց Կայծ Մինասյանը:
Վերջինիս համոզմամբ, այս պայմաններում լավ կլինի, որ ԵԱՀԿ Մինսկի խմբի դիտորդները խոսեն իրականության դիրքերից և փորձեն բացահայտել, թե հակամարտության որ կողմն է բախումներ և սադրանքներ սկսում: Ըստ Մինասյանի՝ պետք է միշտ ասել, որպեսզի հստակ լինի՝ որտեղ են պատասխանատուները, որովհետև երկու կողմերին միևնույն մակարդակի վրա մղելը նշանակում է անտարբերություն ցուցաբերել և ձգձգել բանակցային գործընթացը, որպեսզի լարվածությունը շարունակվի:
«Հակառակը պետք է անել, որպեսզի երկու կողմերն էլ պատասխանատու կեցվածք ունենան: Եթե կամք կա, ապա հնարավոր է դա պարզել»,- նշեց Կայծ Մինասյանը:
Հարցին, թե ինչու ՀԱՊԿ-ը չի արձագանքում Հայաստանի անվտանգության սպառնալիքին այս օրերին՝ պատասխանեց, որ ՀԱՊԿ-ը լիազորված չէ ՄԱԿ-ի Անվտանգության խորհրդի կամ ԵԱՀԿ Մինսկի խմբի կողմից խառնվելու գործընթացին:
« Առաջին անգամ չէ, որ բախումներ են լինում և հայտարարություններ են տարածում, բայց չեն ցանկանում գնալ, քանի որ Հայաստանը անդամակցում է այդ պայմանագրին, իսկ Ադրբեջանը ՌԴ-ի գործընկերն է: ՀԱՊԿ-ը չի կարող փոքրիկ բախումների համար արտահայտվել, մի քանի անգամ գլխավոր քարտուղարը հայտարարել է, որ մեծ գործողության դեպքում կաջակցեն Հայաստանին, բայց ոչ նման դեպքերի պարագայում: Ուստի հայկական կողմն ինքը պետք է դեպքերի վերահսկողության մեխանիզմ ստեղծի ապացուցելու, ոե որ կողմն է սադրանքի իրական հեղինակը»,- նշեց նա:
