Հայտնի ամերիկացի միլիարդատեր և ներդրող Կարլ Այկանը շարունակում է մեծացնել իր մասնաբաժինը Apple կորպորացիայի բաժնետիրական կապիտալում:
Հունվարի 23-ին նա բաց նամակ է գրել ընկերության բաժնետերերին, որում հայտնել է, թե ևս 500 մլն դոլարի բաժնետոմսեր է գնել և իր ներդրումների ընդհանուր գումարը հասցրել 3.6 մլրդ դոլարի: Այս մասին փոխանցում է ITAR-TASS-ը:
ԶԼՄ-ների գնահատականներով՝ ինչպես նախկինում, Այկանին է պատկանում Apple-ի բաժնետիրական կապիտալի մեկ տոկոսից քիչ մասը: Այնուհանդերձ, կորպորացիայի արժեթղթերը նրա համար խոշորագույն ներդրում են:
Նա նշել է, որ բաժնետոմսերի մասշտաբային հետգնում անցկացնելու կորպորացիայի ղեկավարության ցանկության բացակայությունը վնաս է հասցնում բաժնետերերին:
2013-ի օգոստոսին ներդրողը հայտնել էր, որ դարձել է Apple-ի խոշոր բաժնետեր:
