ԱՄՆ Կենտրոնական հետախուզական վարչությունը 15 միլիոն դոլար է ծախսել Լեհաստանի տարածքում ահաբեկչության մեջ կասկածվող անձանց համար գաղտնի բանտ կառուցելու նպատակով: Ինչպես հաղորդում է ITAR-TASS-ը՝ վկայակոչելով տեղի ԶԼՄ-ներին, տոպրակով փողերը 2003թ. սկզբին դիվանագիտական փոստով հասել են Վարշավա:
2001թ. սեպտեմբերի 11-ի ահաբեկչությունից հետո ԿՀՎ-ն վարձակալել է Լեհաստանի հետախուզությանը պատկանող առանձնատուն Ստարե Կեյկուտի գյուղում: Օբյեկտն ամբողջությամբ վերակառուցվել է, քանի որ նախատեսված չի եղել բանտարկյալների պահման համար: «Ալ-Քաիդա»-ի հետ կապեր ունենալու մեջ առաջին կասկածյալներն այստեղ են բերվել 2002թ. դեկտեմբերի 5-ին:
ԶԼՄ-ների տվյալներով՝ գաղտնի բանտի ղեկավարը, որտեղ բանտարկյալները ենթարկվում էին կտտանքների, եղել է ոմն Մայքլ Սիլի: Բանտը փակվել է 2003թ. սեպտեմբերին, իսկ բանտարկյալները տեղափոխվել են Ռումինիայում և Մարոկկոյում տեղակայված ԿՀԸՎ-ի համանման օբյեկտներ:
Ակնկալվում է, որ Լեհաստանի սենատը մոտակա ժամանակներս հաշվետվություն կհրապարակի գաղտնի բանտի մասին:
