Ազգային ժողովի արտահերթ ընտրություններում դիտորդական առաքելություն կիրականացնի ԱՊՀ երկրների 72 ներկայացուցիչ: Այս մասին նոյեմբերի 22-ին Կենտրոնական ընտրական հանձնաժողովում լրագրողների հետ զրույցում նշեց ԱԺ արտահերթ ընտրություններում ԱՊՀ դիտորդական առաքելության շտաբի ղեկավար Եվգենի Սլոբոդան:
«Առաքելության նպատակը մեկն է՝ որպեսզի ընտրություններն անցնեն հանգիստ, օրենքներին համապատասխան, և մենք ամեն ինչով կնպաստենք ազատ ու ժողովրդավար ընտրությունների անցկացմանը: Ներգրավված է լինելու շուրջ 72 դիտորդ, անցած տարի նրանց թիվը 76-ն էր, ինչն ամբողջովին բավարարեց Հայաստանի Հանրապետության համար»,- ասաց Սլոբոդան:
Շտաբի ղեկավարի խոսքով` առաքելության կազմում լավ պատրաստված անդամներ են:
«Ներկայացուցիչների կազմում պատգամավորներ են, ընտրական հանձնաժողովների անդամներ: Այս պահի դրությամբ՝ իրենց մասնակցությունը հաստատել են Բելառուսը, Ռուսաստանը, Տաջիկստանը, Թուրքմենստանը, Ղրղզստանը, Ղազախստանը, նյութեր ենք սպասում Ուզբեկստանից, Մոլդովայի Հանրապետությունից նույնպես ներկայացուցիչներ կլինեն»,- նշեց Եվգենի Սլոբոդան:
Հայաստանում արտահերթ խորհրդարանական ընտրությունները կայանալու են 2018 թ. դեկտեմբերի 9-ին: Քարոզչության ժամանակահատվածը նոյեմբերի 26-ից դեկտեմբերի 7-ն է։ Ընտրական օրենսգրքով սահմանվել է 12-օրյա ժամկետ:
