Ուկրաինական Չերկասի քաղաքում ավելի քան 5 հզ. մարդ գրոհել է մարզային վարչակազմի շենքը: Ոստիկանությունը չի կարողացել վերահսկել այդքան մարդկանց և բարիկադ է ստեղծել ներսում:
Ինչպես հաղորդում է ИТАР-ТАСС-ը՝ նահանգապետ Սերգեյ Տուլուբի հրաժարականը պահանջող ցուցարարների վրա պատուհաններից ջուր են լցնում և լուսաձայնային նռնակներ նետում:
Տերնոպոլ քաղաքում ընդդիմության կողմնակիցները կոտրել են մարզային վարչակազմի շենքի դուռը և գրավել այն: Այդ ընթացքում մարզի նահանգապետ Վալենտին Հոպտյանինը և նրա տեղակալները շենքում չեն եղել:
Լվովում և Ռովնոյում ցուցարարները արդեն զբաղեցրել են պետական կառավարական շենքերը:
Խմելնիցկի քաղաքում տեղի վարչակազմի շենքի մոտ բարիկադներ են կառուցվում: Ցուցարարները փորձում են գրավել կառավարության շենքերը Իվանո-Ֆրանկովսկում և Ժիտոմիրում: Ցուցարարները պահանջում են իրավապահների չուղարկել Կիև և անմիջապես շրջանային խորհուրդ հրավիրել Կիևում տիրող իրավիճակի կարգավորման համար:
Պետական հաստատությունների գրավման կապակցությամբ տեղի դատախազությունները քրեական գործեր են հարուցել:
