Երևանի ընդհանուր իրավասության դատարանի՝ Կենտրոն վարչական շրջանի տարածքում գտնվող նստավայրում Արմեն Բեկթաշյանի նախագահությամբ շարունակվեց «Անելիք» բանկի իրավաբանական վարչության պետի սպանության գործի քննությունը:
54-ամյա Մկրտիչ Պողոսյանը մեղադրվում է ծանրացուցիչ հանգամանքում կատարած դիտավորյալ սպանության համար՝ ՀՀ քրեական օրենսգրքի 104 հոդվածի 2-րդ մասի 2-րդ կետով:
Սպանությունը տեղի է ունեցել 2015 թվականի նոյեմբերի 24-ին, ժամը 20-ն անց 40-ի սահմաններում Երևանի Վարդանանց փողոցում:
Տաքսու վարորդ Մկրտիչ Պողոսյանը իր մեքենայի միջից հանել է որսորդական հրացանը ու, ծառայողական գործունեության կատարման հետ կապված, սպանելու դիտավորությամբ մեկ կրակոց է արձակել «Անելիք» բանկի իրավաբանական և խնդրահարույց վարկերի վերադարձման վարչության պետ, 32-ամյա Հովհաննես Աթանյանի աջ թիկունքային շրջանին և տեղում սպանել է նրան:
Սպանվածը ծնունդով Շիրակի մարզից էր, նախկին դատավոր Լեռնիկ Աթանյանի որդին, երկու անչափահաս երեխաների հայր:
Ըստ գործի նյութերի՝ Մկրտիչ Պողոսյանը մի քանի տարի շարունակ գույքային վեճ է ունեցել «Անելիք» բանկի հետ: Նա մի քանի հանդիպում է ունեցել տուժող Հ. Աթանյանի հետ: Հերթական մերժողական պատասխանը ստանալով բանկի իրավաբանական ու խնդրահարույց վարկերի վերադարձման վարչության պետից՝ Մկրտիչ Պողոսյանը վճռել է կյանքից զրկել նրան:
Մի քանի ժամ անց նա որսորդական հրացանից կրակել ու սպանել է Հ. Աթանյանին:
Դեռ 2012 թվականին Մկրտիչ Պողոսյանը վաճառել է իրենց ընտանիքին պատկանող «Անգելինա» ռեստորանը:
Ռեստորանի ներսում եղած գույքը պայմանագրով անհատույց օգտագործման է հանձնվել ռեստորանի նոր սեփականատիրոջը: Վերջինս ռեստորանը գրավադրել է «Անելիք» բանկում ու դրա դիմաց ստացել է 1 միլիոն 300 հազար դոլար վարկ: Հետագայում նա վարկային պարտավորությունները չի կատարել, գրավադրված գույքը դարձել է բանկի սեփականությունը:
Մկրտիչ Պողոսյանը դիմել է բանկին՝ ռեստորանում մնացած շարժական գույքի դիմաց բանկից պահանջելով 300 հազար դոլար: Բանկը մերժել է Մկրտիչ Պողոսյանին՝ պատճառաբանելով, որ անշարժ գույքի հետ միասին գրավադրված է եղել նաև ռեստորանում առկա շարժական գույքը, որի վրա նույնպես բռնագանձում է տարածվել, այն ևս դարձել է բանկի սեփականությունը և չի կարող վերադարձվել:
Մկրտիչ Պողոսյանը այդ հարցով դիմել է բանկի իրավաբան, ապա և վարչության պետ Հովհաննես Աթանյանին, բայց միշտ մերժում է ստացել: Նա դիմել է նաև դատարան, բայց քաղաքացիական գործի քննությունը դեռ չավարտված՝ իմացել է, որ «Անգելինա» ռեստորանը ներսում առկա գույքով հանդերձ շահագործվում է: Այդ հանգամանքը Պողոսյանին հանել է հունից…
Նախաքննության սկզբում Մկրտիչ Պողոսյանին մեղադրանք էր առաջադրվել պարզապես դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:
Սակայն երբ քննության ընթացքում պարզվել է, որ սպանությունը կապված է տուժողի ծառայողական գործունեության կատարման հետ, Մկրտիչ Պողոսյանին առաջադրված մեղադրանքը ծանրացվել է, նրան մեղադրանք է առաջադրվել հոդվածի ավելի ծանր մասով՝ 104 հոդվածի 2-րդ մասի 2-րդ կետով:
Այս գործը դատավոր Արմեն Բեկթաշյանի վարույթում է 2016 թվականի հուլիսից: Ամբաստանյալը մի քանի պաշտպան է փոխել այս ընթացքում, ներկայումս նրա շահերի պաշտպանը փաստաբան Ա. Սիրունյանն է:
Հերթական անգամ դատարան չէր ներկայացել գործով վկա Էդվարդ Ս.-ն: Կողմերն արձանագրեցին, որ դատարանը բոլոր հնարավոր միջոցները ձեռնարկել է՝ նշված վկայի ներկայությունը դատարանում ապահովելու համար, սակայն դա չի հաջողվել: Պաշտպանական կողմը չառարկեց, որ դատարանում հրապարակվի վկայի նախաքննական ցուցմունքը:
Վկան նշել էր, որ Մկրտիչ Պողոսյանին, որպես հարևանի՝ ճանաչում է շուրջ 6 տարի: Ապրում է Աշտարակում, որտեղ կնոջ հետ ապրում էր նաև Մկրտիչ Պողոսյանը:
Վկան հայտնել էր, որ Մկրտիչը մտերիմ էր իր հետ, նա իրեն պատմել էր, որ խնդիրներ ունի «Անելիք» բանկի հետ:
Վկային հայտնի էր, որ բանկը պարտքերի դիմաց բռնագանձել էր «Անգելինա» ռեստորանը՝ շարժական գույքի հետ միասին: Մկրտիչը դատական կարգով պայքարում էր ռեստորանում եղած գույքի դիմաց փոխհատուցում ստանալու համար:
Վկա Էդվարդ Ս.-ն նշել է, թե Մկրտիչը պարբերաբար դժգոհել է, որ դատական նիստերը միշտ հետաձգվում են: Նա հայտնել է, որ ռեստորանի գույքի վրա կալանք էր դրված, բայց բանկի իրավաբանների շեֆը անօրինական կերպով գույքը վաճառել է, նա դրա իրավունքը չուներ:
Ըստ վկայի՝ Մկրտիչն ասել է, թե «Անելիք» բանկի իրավաբանների շեֆը իր «արունը խմել է»: Մկրտիչը զայրացած պատմել է, որ «այդ տղան» իր հետ խոսակցության ժամանակ իրեն «ծաղրել է»…
Վկան նշել է, թե Մկրտիչը ոչինչ չի ասել բանկի իրավաբանների «շեֆին» վնասելու ցանկության մասին: Իսկ դեպքի օրը, երբ ինքը հեռուստատեսությամբ լսել է բանկի իրավաբանի սպանության մասին, ենթադրել է, որ Մկրտիչը սպանած կլինի…
Դեպքի օրը, սպանությունից 20 րոպե հետո վկա Էդվարդ Ս.-ն իր հեռախոսահամարից զանգել էր Մկրտիչին՝ իմանալու համար, թե որտեղ է: Մկրտիչն ասել էր, թե Երևանում է, շուտով տուն կվերադառնա: Սակայն նա այդպես էլ չի վերադարձել…
Գործով վկաների հարցաքննությունը վերջապես ավարտված հայտարարվեց:
Ամբաստանյալի շահերի պաշտպան, փաստաբան Ա. Սիրունյանը հայտարարեց, որ մինչև ամբաստանյալի հարցաքննությանն անցնելը պաշտպանական կողմը լրացումներ ունի, որոնք կկատարի հաջորդ դատական նիստին՝ նոյեմբերի 29-ին:
