Խորհրդարանի առաջիկա ընտրությանն ընդառաջ արվող ամենաբազմազան դիտարկումների շարքում բավական հաճախ նկատելի է միտքը նոր խորհրդարանի ժամանակավոր կամ անցումային լինելու մասին: Դրա հիմքում այն փաստարկը կամ կանխատեսումն է, որ մեկ-երկու տարի անց նոր խորհրդարանը չի արտահայտելու հասարակական պատկերը և, ըստ այդմ, առաջանալու է նոր ընտրության և խորհրդարանի անհրաժեշտություն: Նախ, պետք է արձանագրել այն, որ հաճախակի ընտրությունները՝ բնականաբար արտահերթերը, խորհրդարանական կառավարման մոդելների պարագայում հաճախակի պատահող երևույթ են: Հենց այս պահին մենք ունենք այդպիսի օրինակ Իսրայելում, որտեղ օրերս տեղի ունեցած բախումը ՀԱՄԱՍ-ի հետ և հետո հրադադարի ստորագրումը դարձավ կառավարող կոալիցիայի փլուզման պատճառ, և նշանակվեց արտահերթ ընտրություն: Այլ կերպ ասած, արտահերթ ընտրությունն ընդամենը քաղաքական գործընթացի մի օղակ է, շղթայի մի մաս, որի նպատակը քաղաքական ճգնաժամեր թույլ չտալն է: Այսինքն՝ արտահերթ ընտրությունն ապակայունություն չէ, այլ քաղաքական ճգնաժամի չեզոքացման լեգիտիմ, իրավական, սահմանադրական հնարավորություն:
Թեմայի շուրջ «Առաջին լրատվական-» ի հետ քննարկմանը մասնակցեցին «Իրազեկ քաղաքացիների միավորում» ՀԿ ծրագրերի համակգող Դանիել Իոաննիսյանը, վերլուծաբաններ Արմեն Բադալյանը և Հակոբ Բադալյանը:
«Նոր խորհրդարանը լինելու է ոչ թե ժամանակավոր, այլ անցումային, ունենք քաղաքական նոր համակարգի, նոր դասի ձևավորման խնդիր, սերնդափոխության խնդիր»- նշեց Հ. Բադալյանը՝ հավելելով, որ այդ բեռն ընկնելու է նոր խորհրդարանի վրա:
Ա. Բադալյանի կարծիքով՝ ժամանակավոր խորհրդարանի գաղափարը շրջանառության մեջ է դրվում որպես փիար տեխնոլոգիա, որպեսզի ազդեն ընտրության վրա:
Անդրադառնալով Ընտրական օրենսգրքի փոփոխության անհրաժեշտությանը՝ Ա. Բադալյանը նշեց. «Երբ որ համամասնական ցուցակ է ձևավորվում, շոգեքարշի էֆեկտ ունի, վարչապետի ուսերին նստած՝ հարյուրավոր մարդիկ են մտնելու խորհրդարան, և մենք չենք իմանալու, նրանք որպես անհատ, ովքեր են: Իսկ հիմա նրանք պետք է ցույց տան, որ մրցունակ են»:
Մանրամասն՝ տեսանյութում:
