«Դա Լուկաշենկոյի ոճն է, ո՛չ առաջին, ո՛չ երկրորդ, ո՛չ էլ տասներորդ անգամ է, որ նա այդպես է ներկայացնում իր պետության շահերը»,-«Առաջին լրատվական»-ի հետ զրույցում ասաց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը՝ անդրադառնալով ՀԱՊԿ-ի շուրջ ստեղծված իրավիճակին և Բելառուսի արտգործնախարարության արձագանքին։
Իսկանդարյանը հավելեց. «Այլ հարց է, որ նախկինում այդ ոճը Հայաստանին առանձնապես չէր վերաբերում կամ էլ Հայաստանը Բելառուսի առաջնահերթություններում չուներ այսչափ կարևորություն»։
Մեր այն դիտարկմանը, թե Փաշինյանը և Հայաստանում տեղի ունեցածն այնքան էլ ընկալելի չէ ՀԱՊԿ անդամ երկրների ղեկավարների կողմից, Ալեքսանդր Իսկանդարյանը պատասխանեց. «Ես չեմ կարծում, որ ՀԱՊԿ-ը ծեր դիկտատորների ակումբ է, որտեղ նստած չեն սիրում իրենց ոչ նման մարդկանց։ Այո՛, Պուտինը, Նազարբաևը, Լուկաշենկոն մարդիկ են, որոնք շատ վաղուց իշխանության ղեկին են, բայց մյուս կողմից էլ, ՀԱՊԿ-ի կազմի մեջ է Ղրղըզստանը, որը ապրել է այդ նույն փողոցային քաղաքականությունն ու հեղափոխական փոփոխությունները։ Ընդհանրապես, եթե իմ տարիքի մարդիկ հետաքրքրված են 90-ականների քաղաքականությամբ, ապա կհիշեն, որ Լուկաշենկոն իշխանության է եկել ճիշտ այնպես, ինչպես պարոն Փաշինյանը։ ՀԱՊԿ-ում տարբեր առաջնորդներ են, և ժամանակ է պետք նոր առաջնորդներին սովորելու համար, ցանկացած կոլեկտիվում այդպես է»։
Իսկանդարյանը միևնույն ժամանակ նշում է՝ Փաշինյանը տարբերվում է ՀԱՊԿ անդամ մյուս ղեկավարներից, բայց պետք չէ մտածել, թե այդ գործոնը որոշակի ազդեցություն ունի. «Ասել, որ երբ տեսնում են մի մարդու, որը նման ճանապարհով է եկել իշխանության ու այնպիսի անձնական տհաճություն են զգում, որ հաց ուտել չեն կարողանում՝ այդպես մտածել պետք չէ»։
