Շենգավիթ վարչական շրջանի ընդհանուր իրավասության դատարանում Ալեքսանդր Ազարյանի նախագահությամբ ավարտվել է Գևորգ Գալստյանի և նրա ղեկավարած ՍՊԸ-ի երեք աշխատողների գործի դատավարությունը:
47-ամյա Գևորգ Գալստյանը « Հայր և որդի Գալստյաններ» ՍՊԸ-ի տնօրենն է: Նա իր հետ հանցավոր արարքի կատարմանը տարել է նույն ՍՊԸ-ի փոխտնօրեն, 37-ամյա Հովիկ Ալավերդյանին, ՍՊԸ-ի բանվորներ՝ Նորաբաց գյուղի բնակիչներ, եղբայրներ՝ 34-ամյա Համլետ Գրիգորյանին և 28-ամյա Պատվական Գրիգորյանին:
Ըստ դատական ակտի՝ նախորդ օրը կրտսեր եղբոր՝ Գարիկ Գալստյանի հետ վիճաբանելու կապակցությամբ Հարություն Ավագյանից պարզաբանումներ ստանալու նպատակով Գևորգ Գալստյանն իր ՍՊԸ-ի երեք աշխատողների հետ նախնական համաձայնությամբ, նրանց հետ, իր վարած «Մերսեդես» ավտոմեքենայով գնացել է Հարություն Ավագյանին առևանգելու:
2013 թվականի սեպտեմբերի 2-ին, առավոտյան ժամը 9-ի սահմաններում նրանք գնացել են Ներքին Չարբախում բնակվող Ավագյանի տան մոտ, կանչել են նրան: Երբ վերջինս տնից դուրս է եկել, Համլետը, Պատվականը և Հովիկը իրենց տնօրենի խրախուսական հայացքի ներքո բռնության միջոցով Հարությունին նստեցրել են «Մերսեդես» ավտոմեքենան, իրենք էլ են նստել, ապա Գևորգ Գալստյանը վարել է մեքենան, ու հեռացել են՝ բացահայտ առևանգելով Հարություն Ավագյանին:
Նրան տարել են Նորաբաց գյուղ, մի քանի ժամ պահել «Հայր և որդի Գալստյաններ» ՍՊԸ-ի մսամթերքի արտադրամասում և բաց են թողել:
Ամբաստանյալները դատարանում հրաժարվել են ցուցմունքներ տալուց:
Նախաքննության ժամանակ Գևորգ Գալստյանը հայտնել է, թե կրտսեր եղբոր հետ նախորդ օրվա վիճաբանության վերաբերյալ ցանկացել է խոսել Հարություն Ավագյանի հետ:
Իր մեքենայով Հովիկի, Համլետի ու Պատվականի հետ գնացել են Հարությունի տուն: Ձայն են տվել:
Երբ Հարությունը դուրս է եկել տան դարպասներից, իր պահանջով Համլետը Հարությունի ձեռքից քաշելով՝ նստեցրել է մեքենա: Հարությունին տարել են Նորաբաց գյուղի իրենց արտադրամաս: Որոշ ժամանակ հետո նրան բաց են թողել:
Տուժող Հարությունը հայտնել է, թե ինքը ստիպողաբար չի նստել Գևորգ Գալստյանի վարած «Մերսեդեսը»: Իր նկատմամբ բռնություն չեն գործադրել, չեն հարվածել, իրեն չեն առևանգել: Դատարանն այս ցուցմունքը գնահատել է որպես ոչ արժանահավատ:
Նախաքննական ցուցմունքում Հարությունն ասել է իր նկատմամբ բռնության գործադրման, ստիպողաբար մեքենա նստեցնելու մասին: Ասել է նաև, որ այդ ընթացքում իր մորը հրել են, նա ընկել է գետնին:
Հարությունի մայրը հայտնել է, որ դեպքի օրը դարպասների մոտից կանչել են՝ Ճուտ: Ինքը դուրս է եկել, ասել, որ իրենց տանը «Ճուտ» չկա: Պահանջել են, որ որդուն դուրս կանչի:
Որդին քնած է եղել, ինքն արթնացրել է, ասել, որ դրսում կանչում են:
Հարությունը հագնվել ու դուրս է եկել: Ինքը գնացել է որդու հետևից: Տեսել է, որ երեք հոգի հարձակվել են որդու վրա, բռնել ոտքերից ու ձեռքերից և հարվածելով՝ փորձել են նստեցնել դարպասի մոտ կանգնած սև մեքենան: Հարձակվողներին խանգարելու համար ինքը բռնել է որդու ոտքերից, բայց Համլետը հարվածել, իրեն վայր է գցել: Հարությունին նստեցրել են մեքենա ու տարել անհայտ ուղղությամբ: Որդին տուն է վերադարձել ժամը 16-ին:
Տուժողն այս ցուցմունքը պնդել է նաև մեղադրյալների հետ առերես հարցաքննության ժամանակ:
Հարությունի մոր ցուցմունքներին համահունչ ցուցմունքներ է տվել նրա ընկերուհին, ում տուն է գնացել Հարությունը՝ առևանգողների մոտից ազատվելուց հետո, և ասել, որ իրեն ստիպողաբար տարել են պարզաբանման, բայց պարզվել է, որ թյուրիմացություն է եղել, ինքը նախորդ օրը ոչ մեկի հետ չի վիճել:
Հարությունի հարևանուհին հայտնել է, թե դեպքի օրվա առավոտյան փողոցից լսել է հարևանուհու բղավոցը: Դուրս է եկել ու տեսել՝ ինչպես են երեք անծանոթ երիտասարդներ Հարությունին քաշելով նստեցնում դարպասի մոտ կայանած մեքենան: Մայրը բռնել է որդու ոտքերից, բայց երիտասարդներից մեկը հարվածել է, նրան գցել գետնին, ապա հետևի աջ դռնից Հարությունին նստեցրել են մեքենա ու տարել:
Ահա այսպես մսամթերքի արտադրամասի տերը «բեսպրեդելի» հասնող «պարզաբանում» է կատարել՝ իր աշխատողներին տանելով մարդու առևանգման:
Ընդհանուր իրավասության դատարանը հաստատված է գնահատել չորս ամբաստանյալների մեղքը մարդու առևանգման համար՝ ՀՀ քրեական օրենսգրքի 131 հոդվածի 2-րդ մասի 1-ին կետով:
Գևորգ Գալստյանն ու Համլետ Գրիգորյանը դատապարտվել են 5-ական, իսկ Հովիկ Ալավերդյանն ու Պատվական Գրիգորյանը՝ 4-ական տարի ազատազրկման:
Պատժի սկիզբը կհաշվվի դատավճիռն ի կատար ածելու օրվանից, երբ դատապարտյալները կալանքի տակ կառնվեն:
