«Մենք» դաշինքի պատգամավորության թեկնածու, «Հանրապետություն» կուսակցության նախագահ Արամ Զ. Սարգսյանը նշում է՝ իրենք գաղափարական այլընտրանք են լինելու գործող իշխանություններին։ «Ես չեմ առաջարկում դուրս գալ ՀԱՊԿ-ից, բայց Բոլթոնն առաջարկեց զենք գնել ԱՄՆ-ից։
Ցավում եմ, որ մեր արտգործնախարարությունը հայտարարեց, որ կոնկրետ առաջարկ չի եղել, դրանից կոնկրետ ի՞նչ պետք է լինի։ Այս իշխանությունները վարում են նախկինների արտաքին քաղաքականությունը»,- «Առաջին լրատվական»-ի հետ զրույցում ասաց նա։
Մեր զրուցակիցն ընդգծեց. «70 տոկոսը «Իմ քայլը» դաշինքինն է, քանի որ իրենք հեղափոխություն են արել ու վաստակել են այդ տոկոսը, իսկ 30 տոկոսի քվեն տալուց ժողովուրդը պետք է խոր մտածի՝ ինչքանով է վստահում այդ ուժին, ինչքանով են անկեղծ եղել իր հետ, ինչքանով են պայքարել փոփոխությունների համար։ Ես ասում եմ՝ «Մենք» դաշինքը գնում է հաղթելու, բայց հաղթել չի նշանակում՝ գնում ենք վարչապետ դառնանք կամ Նիկոլ Փաշինյանի ձեռքից խլենք այդ պաշտոնը։ Ինձ համար հաղթելը կլինի այն, որ նոր ԱԺ-ում, երկու ամիս հետո հանրությունն ասի, որ «Իմ քայլը» դաշինքի միակ այլընտրանքը «Մենք» դաշինքն է»։
Մեր այն դիտարկմանը, թե արևմտյան և հատկապես խոր հակառուսական ուղղվածություն ունեն նաև «Սասնա ծռերը», Արամ Զ. Սարգսյանն արձագանքեց. «Համեմատության եզր անգամ չկա մեր ու իրենց միջև։ Մենք կատեգորիկ դեմ ենք եղել զենքի ուժով իշխանություն փոխելուն, մենք բացարձակ հակադիր բևեռներում ենք եղել մշտապես։ Մեզ ում հետ ասես կարելի է համեմատել՝ բացի «Սասնա ծռեր»-ից։
