Կամբոջայի բուդդիստական տաճարներից մեկում գողացել են Բուդդայի աճյունափոշով լի սափորը: Վանականները դուրս են եկել փողոցներ՝ կառավարությանը կոչ անելով հետաքննություն անցկացնել և վերադարձնել մասունքը:
Հստակ հայտնի չէ, թե ինչ է եղել սափորում: Վարկածներից մեկի համաձայն՝ այնտեղ աճյունափոշի է եղել, մեկ այլ վարկածով՝ բուդդիզմի հիմնադրից մնացած մասեր՝ ատամներ, մազեր, ոսկրերի մնացորդներ: Այս մասին հայտնոում է The Globe and Mail-ը:
Գողությունը թեժացրել է կառավարության ու վանականների միջև քաղաքական տարաձայնությունները: Կրոնական գործիչները հայտարարում են, որ եթե իշխանությունները չկարողանան պաշտպանել բուդդիստական ամենագլխավոր մասունքը, ապա մշակույթի ու կրոնի հարցերով նախարարները պետք է հրաժարական տան:
«Այն փաստը, որ նրանք չեն զբաղվում հետաքննությամբ, վկայում է այն մասին, որ նրանք ցանկանում են առհասարակ արմատախիլ անել կրոնը երկրում»,- ասել է 22-ամյա վանական Ում Սոմաունը:
Վանականներն անձամբ չեն կասկածում, որ գողացված մասունքն արժեքավոր է, քանի որ աճյունափոշին նրանց էր նվիրել Շրի Լանկայի կառավարությունը 1957 թվականին՝ Բուդդայի ծննդյան 2500-ամյակի առթիվ:
