ՀՀ ԿԳ նախարար Արմեն Աշոտյանը այսօր ՀՀ բուհերի վարկանիշավորման ազգային համակարգի շնորհանդեսի բացմանը նշեց, որ երկար տարիներ խոսվում էր այն մասին, որ հայկական համալսարանները չեն ընդգրկվում միջազգային համալսարանների վարկանիշավորման համակարգում, ինչը, ըստ նրա, ուներ օբյեկտիվ և սուբյեկտիվ պատճառներ:
Նախարարի խոսքով՝ շատ երկրներ, որոնք ընդգրկված չեն միջազգային վարկանիշավորման համակարգում, անցել են ազգային վարկանիշավորման համակարգի ներդրմանը. Հայաստանը նույնպես բացառություն չէ: Վարկանիշավորումը, որպես մեթոդաբանություն, մշակվել է՝ հաշվի առնելով միջազգային փորձը:
«Մեզ համար աշխատել են մարդիկ, ովքեր ժամանակին մշակել են համաշխարհային վարկանիշավորման մեթոդներ և տարբեր տիպի ռեյտինգային համակարգեր»,- ասաց նախարարը՝ հավելելով, որ այս տարի ծրագիրը կրելու է պիլոտային բնույթ, որովհետև այն մեթոդաբանությունը, որում ընդգրկվում են տասնյակ չափանիշներ, տարվա ընթացքում ունեն լրամշակման կարիք:
Նախարարը նշեց, որ սա փորձնական վարկանիշավորում է, որովհետև տարբեր չափանիշների տեսակարար կշիռը, ազդեցությունը վարկանիշի վրա մշակվելու են 2015-ի այս օրերին:
Լուսանկարը` PanARMENIAN Photo-ի
