ՀՀ ոստիկանությունը հաղորդագրություն է տարածել՝ Գյումրու քաղաքապետ Ս.Բալասանյանի առանձնատան վրա կատարված հարձակման վերաբերյալ ԶԼՄ-ներում հունվարի 22-ին տարածված տեղեկությունների վերաբերյալ:
Ըստ այդ տեղեկությունների՝ Գյումրու նախկին քաղաքապետի որդին՝ Սպարտակ Ղուկասյանը, ընկերների հետ մեքենաներով մոտեցել է քաղաքապետ Սամվել Բալասանյանի առանձնատանը և նրա հասցեին հայհոյանքներ ու սպառնալիքներ հնչեցրել:
Դեպքը տեսանկարահանվել է տարածքում տեղադրված տեսախցիկներով: Ինչպես տեղեկանում ենք ՀՀ ոստիկանության պաշտոնական կայք-էջից, հրապարակման առնչությամբ՝ ոստիկանության Շիրակի մարզի քննչական բաժնում նախապատրաստվում են նյութեր:
Հանձնարարություններ են տրվել հետաքննական մարմնին` ձեռնարկելու օպերատիվ-հետախուզական միջոցառումներ՝ պարզելու դեպքի իրական հանգամանքները, ինչպես նաև՝ ԶԼՄ-ներում զետեղված տեղեկատվության հավաստիությունը:
Կատարվել է դեպքի վայրի զննություն, որտեղ արձանագրվել են տեսախցիկների առկայությունը, կնքվել է տեսանկարահանող և պահպանող սարքերի սենյակը:
Բացատրություններ են վերցվել հարևանությամբ բնակվող և աշխատող անձանցից: Նյութերի նախապատրաստումը շարունակվում է:
