Վրաստանում հասունանում է սկանդալ՝ կապված սեփական Անվտանգության խորհուրդ ձևավորելու վարչապետ Իրակլի Ղարիբաշվիլիի որոշման հետ: Այն կլինի այլընտրանք Ազգային անվտանգության խորհրդին, որը գործում է նախագահին կից:
Ընդդիմությունն արդեն մեղադրել է վարչապետին ու իշխող «Վրացական երազանք» կոալիցիային իշխանության զուգահեռ կառույցների ստեղծման մեջ, իսկ փորձագետները հայտնում են կոալիցիայում ճգնաժամի մասին՝ վարչապետի լիազորությունների ընդլայնման և նախագահի իրավունքների կրճատման ֆոնին: Այս մասին գրում է Kommersant-ը:
Նոր Անվտանգությա խորհրդի առաջին նիստը կայացել է այս շաբաթ՝ Ղարիբաշվիլիի նախագահությամբ, մինչդեռ նախագահ Մարգվելաշվիլին երկրում չէր՝ այցով գտնվում էր Թուրքիայում: Մասնակիցները առայժմ չեն ներկայացրել առաջին փակ նիստից մանրամասներ՝ հղում անելով գաղտնիությանը:
Ի տարբերություն Ազգային անվտանգության խորհրդի, որը ձևավորվել է համաձայն Սահմանադրության, Անվտանգության խորհուրդը հիմնվել է վարչապետի հրամանի հիման վրա:
Անվտանգության խորհրդի նիստի անցկացումը մեծ արձագանք է առաջացրել երկրում: Առավել ևս, որ Ազգային անվտանգության խորհուրդը վաղուց չի հավաքվել, և հայտնի չէ՝ ընդհանրապես կհավաքվի՞: Նախկինում դա բացատրվում էր այն հանգամանքով, որ Սաակաշվիլիի օրոք Ազգային անվտանգության խորհրդի նիստերին մասնակցելուց հրաժարվել էր վարչապետ Բիձինա Իվանիշվիլին: Սակայն այժմ նախագահն ու վարչապետը ներկայացնում են նույն կոալիցիան:
Քաղաքագետ Ռամազ Սակվարելիձեի համոզմամբ՝ եթե երկրում իրադրության համար պատասխանատու է վարչապետը, ապա հենց նրան կից պետք է գոյություն ունենա համապատասխան մարմինը՝ քննարկելու համար անվտանգության խնդիրները:
