Չինական Lenovo ընկերությունը վերսկսել է բանակցությունները IBM-ից սերվերային բիզնեսի մի մասը գնելու շուրջ: Այս մասին հայտնում են ընկերությանը մոտ իրազեկ աղբյուրները: Գործարքը շահավետ է երկու կողմերի համար էլ: Այն կօգնի IBM-ին արագ անցում կատարել ծրագրային ապահովման և ծառայությունների ոլորտ, իսկ Lenovo-ին կօգնի բազմազան դարձնել իր բիզնեսը՝ համակարգիչների կրճատվող շուկայի ֆոնին:
Խոսքը տվյալների պահման կորպորատիվ կենտրոնների համար x86 բյուջետային համակարգերի վաճառքի մասին է: Եթե կարգավորիչ մարմինները հավանություն տան գործարքին, Lenovo-ն կդառնա այնպիսի հսկաների անմիջական մրցակից, ինչպիսիք են Hewlett-Packard-ն ու IBM-ը:
Lenovo-ն ու IBM-ն այս թեմայով բանակցություններ են անցկացրել անցած տարի, սակայն այն ժամանակ չեն կարողացել պայմանավորվածության գալ գնի վերաբերյալ: ԶԼՄ-ների փոխանցմամբ՝ ամերիկացիները ցանկացել են իրենց բիզնեսի վաճառքից 4-6 միլիարդ դոլար ստանալ, մինչդեռ չինացիները պատրաստ են եղել վճարել 2.5 մլրդ դոլարից ոչ ավելի:
Reuters-ի փոխանցմամբ՝ վերլուծաբանները գործարքը գնահատում են 3 մլրդ դոլարից ոչ ավելի: Հաջողության դեպքում գործարքը կդառնա խոշորագույնը Չինաստանի տեղեկատվական տեխնոլոգիաների ոլորտում:
Հիշեցնենք, որ IBM-ը համակարգիչների բիզնեսից հեռացել է 2005 թվականին՝ իր համակարգչային ստորաբաժանումը վաճառելով Lenovo-ին:
