Հանրապետական կուսակցության հայտարարությունները միակ ընդդիմություն լինելու մասին, հասարակությունը դիտարկում է առավելապես նոր իշխանության հետ հարաբերակցության, միաժամանակ նաև այդ իշխանությանն ընդդիմություն կամ այլընտրանք լինելու խորհրդարանի արտահերթ ընտրությանը մասնակից մյուս սուբյեկտների հանդեպ համեմատության կոնտեքստում: Իրականում, սակայն, ՀՀԿ այդ հայտարարություններն ունեն ուշագրավ երրորդ կողմ, և այդ կողմը Ռոբերտ Քոչարյանն է, որը հայտարարել է կուսակցություն ստեղծելու մտադրության մասին:
Բանն այն է, որ Ռոբերտ Քոչարյանը ևս հայտարարել է ընդդիմադիր կուսակցություն ստեղծելու մասին, և, իհարկե, ոչ բառացի, սակայն բավական թափանցիկ տողատակով ասել է, որ հենց իր կուսակցությունն է հավակնելու լինել Նիկոլ Փաշինյանի իշխանությանն ընդդիմություն և կենտրոնացնել հանրային դժգոհությունը, տրանսֆորմացնել այն քաղաքական ընդդիմախոսության: Այդ համատեքստում, ՀՀԿ հայտարարությունները միակ և լուրջ ընդդիմադիր ուժ լինելու մասին, ըստ էության հակադրվում են Ռոբերտ Քոչարյանի քաղաքական պլաններին, և փաստացի ՀՀԿ-ն հայտարարում է Ռոբերտ Քոչարյանին էլ ընդդիմություն լինելու մասին:
Համենայնդեպս, եթե Վիգեն Սարգսյանը նշում է, որ միայն իրենք կարող են լինել իրական և ուժեղ ընդդիմություն, ապա դա նշանակում է, որ այդպիսի ընդդիմություն չի կարող լինել նաև Ռոբերտ Քոչարյանը: Իհարկե, Վիգեն Սարգսյանն անխոս իրավացի է, որ Քոչարյանն իր ստեղծած կուսակցությամբ չի կարող լինել այդպիսի ընդդիմություն, բայց բոլոր դեպքերում հետաքրքիր է, որ ՀՀԿ-ն հակադրվում է նաև երկրորդ նախագահի քաղաքական պլաններին: Եթե, իհարկե, խոսքը ընդամենն արտահերթ ընտրությանը մասնակցելու ժամանակահատվածի մասին չէ՝ միակ և իրական ընդդիմություն լինելու առումով, իսկ արտահերթ ընտրությունից հետո Վիգեն Սարգսյանն ու ընկերները կդառնան արդեն Ռոբերտ Քոչարյանի ստեղծելիք կուսակցության բազան: Մյուս կողմից, մինչ Քոչարյանի պլաններին կընդդիմանար ՀՀԿ-ն, Ռոբերտ Քոչարյանն ինքը ամիսներ շարունակ, ըստ էության, չնկատեց ՀՀԿ-ին, որն այդքան ջանադրաբար փորձում էր պաշտպանել նրան «քաղաքական հետապնդումներից»: Այդպիսով, ՀՀԿ-ն առաջարկելով Ռոբերտ Քոչարյանին իր ծառայությունը, չարժանացավ նրա հավանությանը և ուշադրությանը: Հավանաբար, այժմ փորձում են վաստակել այդ ուշադրությունը՝ հակադրվելով նրա պլաններին: Կնկատի՞ դա Ռոբերտ Քոչարյանը:
