Մոտ մեկ ամիս ժամանակ է մնացել արտահերթ խորհրդարանական ընտրությունների անցկացմանը։ Քաղաքական ուժերն ինտենսիվ բանակցություններ են վարում այդ ընտրություններին մասնակցելու ձևաչափի շուրջ, մի շարք փոքր կուսակցություններ հնարավոր է միավորվեն և մասնակցեն դաշինքով։
Զուգահեռ կան քննարկումներ, թե այս խորհրդարանը ևս կարող է ժամանակավոր լինել, քանի որ ձևավորվում է մեկ անձի շուրջ և էյֆորիայի պայմաններում։ Կան նույնիսկ տեսակետներ, որ երկու տարի հետո անհրաժեշտ կլինի նոր ընտրություններ անցկացնել, և միայն այդ ժամանակվա ձևավորված խորհրդարանը կլինի կազմավորված իրապես գաղափարական, ծրագրային պայքար տարած ուժերի կողմից։
Փորձագետ Էդգար Վարդանյանը, մինչդեռ, նման հարցադրումը արհեստական է համարում։ «Միայն քաղաքական իրավիճակը կարող է ցույց տալ՝ կա՞ արդյոք արտահերթ ընտրությունների անհրաժեշտություն, թե՞ ոչ։ Մենք այսօր չենք կարող, և ճիշտ չէ ինչ-որ ժամկետ սահմանել խորհրդարանի գործունեության համար այն պարզ պատճառով, որ դա արհեստական է։ Ըստ էության, խորհրդարանական կառավարման համակարգին բնորոշ են հաճախակի իրականացվող արտահերթ ընտրությունները և այդ հանգամանքը պայմանավորված է նրանով, որ փոխվում է քաղաքական իրավիճակ և այդ քաղաքական իրավիճակը ստիպում է որպեսզի քաղաքական ուժերի հարաբերակցության բալանսը փոխվի, հնարավորություն չի լինում ձևավորել կառավարություն, կառավարությունը վստահություն չի վայելում, և անհրաժեշտություն է լինում անցկացնել նոր ընտրություններ, որն այս առումով հստակություն կմտցնի»,- «Առաջին լրատվական»-ի հետ զրույցում ասաց նա։
Վարդանյանն ընդգծեց՝ հասկանալի է, որ մեր Ընտրական օրենսգիրքն ու Սահմանադրությունը դժվարացնում է ավելի հաճախակի արտահերթ խորհրդարանական ընտրությունների անցկացումը. «Ուստի չկա վտանգ, որ չափից ավելի հաճախ կարող են լինել ընտրություններ, բայց մյուս կողմից էլ չպետք է բացառել ու նորմալ վերաբերել։ Բայց նախօրոք գծել ու ասել, թե երբ պետք է այդպիսի ընտրություններ լինեն՝ ճիշտ չեմ համարում»։
Մեր զրուցակիցը նշեց՝ ընդհանրապես արտահերթ ընտրությունները որևէ բացասական բան չեն պարունակում և ցնցումների պատճառ լինել չեն կարող։ «Քաղաքական իրավիճակն է պատասխանատու լինելու այդ ընտրությունների համար։ Եթե բնական ձևով կա պահանջ արտահերթ ընտրություններ անցկացնել՝ չպետք է դիմադրել, որովհետև հակառակը դիմադրելը կստեղծի լարվածություն ու ցնցումներ կառաջացնի։ Հակառակը՝ նման պարագայում արտահերթ ընտրությունները կարող են կայունացնել իրավիճակը և հանգուցալուծել երկրում առկա քաղաքական ճգնաժամը»,- եզրափակեց նա։
Փորձագետ Ռուբեն Մեհրաբյանն ընդգծեց՝ ապագա խորհրդարանի մասին դատողություն անելու համար պետք է տեսնել, թե ինչպիսի խորհրդարան է ձևավորվում։ «Ռեյտինգային ընտրական համակարգը դուրս չի եկել ընտրական գործընթացից ու այդ պատճառով մնում է որոշակի անկանխատեսելիություն։ Եվ հիմա պետք է տեսնել, թե դեկտեմբերի 9-ի ընտրությունների արդյունքում ինչ պատկեր է ձևավորվում և նոր այդ հարցի շուրջ դատողություններ անել»,- «Առաջին լրատվական»-ի հետ զրույցում ասաց նա։
Մեհրաբյանի խոսքերով՝ եթե խորհրդարանում անընդունելիորեն շատ ներկայացված լինեն ապաքաղաքական տարրերը և դա բացասաբար անդրադառնա խորհրդարանի աշխատանքի արդյունավետության վրա, ապա նման խոսակցությունները կսկսեն հիմքեր ունենալ. «Բայց պետք է համբերել ու տեսնել, թե ինչ պատկեր է լինում»։
Ինչ վերաբերում է այն դիտարկումներին, թե խորհրդարանը ձևավորվելու է էյֆորիայի պայմաններում և մեկ անձի շուրջ, Ռուբեն Մեհրաբյանն արձագանքեց. «Ես խնդիրն այդտեղ չեմ տեսնում, խնդիրն այն է, որ խորհրդարանում կարող են հայտնվել քաղաքականության հետ կապ չունեցող, միայն սեփական հարցերը լուծող մարդիկ»։
Փորձագետը հավելեց՝ եթե ընդունենք, որ 2 տարի հետո պետք է լինի նոր խորհրդարան, ապա դա կնշանակի, որ դեկտեմբերի 9-ի արդյունքներով ձևավորված խորհրդարանը կշարունակի մնալ ժամանակավոր։ «Դա, իհարկե, միայն բացասական ազդեցություն կունենա, որովհետև նոր կառավարությունը կշարունակի աշխատել նախընտրական կոնյունկտուրայի տրամաբանության մեջ։ Հետևաբար` այս ընտրություններին քաղաքացիները պետք է ամենայն պատասխանատվությամբ մոտենան իրենց՝ որպես քաղաքացու գործառույթներին ու սթափ քաղաքական ընտրություն կատարեն։ Դա էլ իր հերթին նշանակում է, որ քաղաքական ուժերը պետք է առավելագույնս քաղաքականացնեն ընտրությունները»,- եզրափակեց նա։
