Հասարակական կազմակերպությունները շարունակում են դժգոհել «Հասարակական կազմակերպությունների» և «Հիմնադրամների մասին» օրենքներում ՊԵԿ-ի նախաձեռնած փոփոխություններից։
«Հիմնական խնդիրն այն է, որ հասարակական կազմակերպությունները, ըստ օրենքի, պարտավոր էին հանրային ֆինանսավորման մասով ներկայացնել հաշվետվություններ, և եթե ներկայացվող գումարը գերազանցում էր 5 միլիոնը, ապա պետք է ներկայացներ նաև ֆինանսական աուդիտի եզրակացությունը: Բայց ՊԵԿ-ը 2018թ. փետրվարին ընդունված ոչ իրավաչափ որոշման հիմքով ոչ միայն հանրային ֆինանսների մասով էր հաշվետվություն պահանջում, այլ նաև ՀԿ-ների ամբողջ գործունեության ծավալով, որը չէր բխում օրենքից, և կար այդ խնդիրն ավելի ճշգրտելու անհրաժեշտություն. փաստացի, ՊԵԿ-ը, որպեսզի գնա և կատարի օրենքի պահանջները, հակառակ նախագիծն է բերում, որ այդ ոչ իրավաչափ որոշումը դարձնում է օրենքի մակարդակի»,- «Առաջին լրատվական»-ի հետ զրույցում ասաց Իրավաբանների հայկական ասոցիացիայի նախագահ Կարեն Զադոյանը:
Նրա խոսքով՝ նախկինում ՊԵԿ-ը չէր ներկայացնում այս նախագիծը, բայց ուշագրավ է, որ հենց թավշյա հեղափոխությունից հետո ներկայացվեց այս վիճահարույց նախագիծը. «Հիմա ՊԵԿ-ը ասում է ՀԿ-ներին՝ ներկայացրեք ձեր ամբողջ միջոցները։ ՊԵԿ-ը սրանով լրացուցիչ պարտավորություն է դնում ՀԿ-ների վրա։ Սակայն պետք է բացառվի, բացի հանրային միջոցներից, այլ միջոցների հրապարակումը։ ՊԵԿ-ը այսպիսով փորձում է տոտալ վերահսկողություն վերցնել ՀԿ-ների վրա, որը սխալ է ու հակասում է թավշյա հեղափոխությունից հետո քաղհասարակության դերի բարձրացման սկզբունքին»,- ասաց Զադոյանը՝ հավելելով, որ նախագիծը ներկայացնելուց առաջ պետք էր քննարկում տանել, իսկ եթե դա չի կատարվել, ապա այս նախագիծը պետք է հետ կանչվի ու շահագրգիռ կողմերի հետ քննարկումից հետո նոր ընդհանուր հայտարարի գալ։
Առավել մանրամասն՝ տեսանյությում: