ՀՀ աշխատանքի և սոցիալական հարցերի նախարար Արտեմ Ասատրյանը 2013 թվականի կարևորագույն ձեռքբերումներից առանձնացրեց աշխատավարձերի միասնական համակարգի ներդրումը: Հունվարի 21-ին լրագրողների հետ հանդիպմանը նախարարը հիշեցրեց, որ դեռ 2002 թվականից տարիֆավորական համակարգի ներդրումը սկսվեց, ապա զարգացումները գնացին իրավիճակային լուծումներով, 2008-ին նախաձեռնվեց ամբողջական համակարգը ներդրումը, 2013-ին հաջողվեց դա իրականություն դարձնել:
«Գործելու է մեկ միասնական հիմքով միասնական համակարգ, որ շաղկապված է լինելու մեր երկրում նվազագույն աշխատավարձի հետ: Դա նշանակում է ավելի քան 200 հազար աշխատողների համար միջինը 40 տոկոս աշխատավարձի աճ, իսկ հիմնական օղակներում՝ առաջատար, գլխավոր մասնագետ և այլք, աճը լինելու է 80 և ավելի տոկոս»,- ասաց նա:
Նախարարն առանձնացրեց նաև կենսաթոշակային ոլորտում գործող համակարգի կատարելագործմանն ուղղված աշխատանքները, նշեց, որ ոլորտին հատկացված միջոցներն ավելի նպատակային են ուղղվել: Ծայրահեղ աղքատության շեմից (21 380 դրամ) ցածր գտնվողների թիվը նախկինում 68 հազար էր, իսկ բարձրացման արդյունքում այդ թիվը հասավ (հաշվի առնելով նաև չափանիշների փոփոխությունները) 12 800-ի: Աղքատության ստորին շեմին գտնվող 230.000 քաղաքացիների թիվը դարձել է 138.300, իսկ աղքատության վերին շեմին գտնվողների թիվը 338.000-ից՝ 294.000:
Ասատրյանի խոսքով՝ մեծ շեշտադրում է լինելու պրակտիկայի կազմակերպման վրա, այն կազմակերպվելու է երեք ամսով, որ երիտասարդը կարողանա ձեռք բերել այն հմտություններն ու որակները, որ թույլ կտա դառնալ կայուն զբաղված:
Նախարարը նշեց՝ եթե այս փոփոխությունները չկատարվեին, զբաղվածության ոլորտին հատկացվող միջոցները գնալով նվազելու էին, իսկ այս կերպ ավելի մեծ գումարներ են ուղղվում և ավելի նպատակային են ծախսվում: «Նվազագույն միայնակ կենսաթոշակառու քաղաքացիները՝ մինչև 23 000 դրամ ստացողները, դիմելու դեպքում նաև անապահովության գնահատման համակարգում են ներառվում և նպաստ ստանում՝ աղքատության ընտանեկան նպաստ»,- ասաց նա:
Նախարարը խոսեց նաև կուտակային կենսաթոշակային համակարգի ռեֆորմի մասին, նշեց, որ այն ներդրվել է 2010-ից, ավելի քան երեք տարի քննարկվել, և այն կարծիքները, թե չի կարելի հրատապ ռեֆորմ իրականացնել, հիմնավորված չեն: Նա ասաց, որ շահագրգիռ կողմերի հետ բազմիցս է քննարկվել այս հարցը, սակայն զուտ այն պատճառով, որ քաղաքացիների հետ անմիջական առնչություն չի եղել, տպավորություն է ստեղծվում, թե կառավարության կողմից իրազեկում չի եղել այս ռեֆորմի վերաբերյալ:
Դիտարկմանը, թե ՀՀ երկրորդ նախագահ Ռոբերտ Քոչարյանն իրեն պատասխանելով՝ որակել էր ռեֆորմի կնքահայր, նախարարը պատասխանեց, որ ինքը ևս հպարտ կլինի համարվել այդ ռեֆորմի կնքահայրը: Անդրադառնալով քաղաքական ոչ իշխանական ուժերի՝ կուտակային կենսաթոշակային համակարգի հարցով ՍԴ դիմելուն, նախարարը հայտնեց, որ ցանկացած նոր ներդրված համակարգ իր խնդիրներն ունի, ինչը բնական է, սակայն այդ խնդիրները լուծում ունեն: Ամեն դեպքում, նախարարը նշեց. օրենքն ընդունված է:
«Յուրաքանչյուր քաղաքացի, քաղաքական գործիչ իրավունք ունի դիմել Սահամանադրական դատարան, սակայն մինչ ՍԴ-ի կայացրած որոշումը պարտավոր է հետևել ընդունված օրենքին»,- ասաց նա:
Հարցին՝ մտածե՞լ է՝ ինչ է լինելու այն դեպքում, եթե ՍԴ-ն բավարարի կուտակայինի հարցով իրեն ուղղված հայցադիմումը, ինչպե՞ս են վերադարձվելու քաղաքացիների մի քանի ամիսների գումարները, նախարարը միայն պատասխանեց. «Չեմ մտածել»:
