Կենտրոն և Նորք-Մարաշ վարչական շրջանների ընդհանուր իրավասության դատարանում՝ դատավոր Գագիկ Պողոսյանի նախագահությամբ, սկսվեց և ավարտվեց մամուլից արդեն հայտնի «Ֆինանսական բուրգ»-ի գործով դատական նիստը: Նիստը, սակայն, հետաձգվեց գործով մեղադրյալ Արթուր Անդրեասյանի վատառողջ լինելու պատճառով: Վերջինս դատական նիստերի դահլիճ եկավ մի կերպ՝ ոստիկանների ու կարգադրիչների օգնությամբ: Նա շատ վատառողջ տեսք ուներ: Անդրեասյանն այնքան թույլ էր, որ չէր կարողանում անգամ խոսել և պատասխանել իրեն առաջադրված հարցերին:
Մինչ այդ Անդրեասյանի պաշտպան Համազասպուհի Գրիգորյանի խոսքով՝ իր պաշտպանյալն առողջական լուրջ խնդիրներ ունի, տառապում է գլխուղեղի հետին պատի անիֆրիզմայով: Ամանորից առաջ նրա ինքնազգացողությունն այնպես է վատացել, որ նրան պատգարակով տեղափոխել են «Էրեբունի» բժշկական կենտրոն, ապա՝ «Դատապարտյալների հիվանդանոց» ՔԿՀ: Եվ չնայած նրա վատառողջ վիճակին՝ դատարանը տեղեկացրեց, որ նրան նիստից հետո կրկին տեղափոխելու են «Էրեբունի» ՔԿՀ:
Պաշտպանը «Առաջին լրատվական»-ի հետ զրույցում ասաց, որ Անդրեասյանը չի ընդունում իրեն առաջադրված մեղադրանքը, և որ այն անհիմն է:
Հիշեցնենք, որ Արթուր Անդրեասյանին մեղադրանք է առաջադրվել այն բանի համար, որ նա բուքմեյքերական գործունեությամբ և արտարժույթի առուվաճառքով զբաղվելու արդյունքում հայտնվելով փաստացի անվճարունակ վիճակում՝ 2010թ. հունիսին որոշել է ՀՀ ԿԱ ոստիկանությունում ղեկավար պաշտոններ զբաղեցնող գնդապետ Կարեն Բաբակեխյանի, գեներալ-մայոր Ներսես Նազարյանի, վերջինիս որդու՝ Երևան քաղաքում գործող «Մոսկվիչկա» խանութների ցանցի սեփականատեր Արմեն Նազարյանի, ինչպես նաև նրանց ընտանիքների անդամների հետ ունեցած մտերմության ու դրանով պայմանավորված՝ իր անձի նկատմամբ շրջապատում ձևավորված վստահության շահարկմամբ խաբեության և վստահությունը չարաշահելու եղանակով ձեռնարկատիրական գործունեության մեջ ներդնելու և դրա դիմաց շահույթներ ստանալու պատրվակով հափշտակել տարբեր քաղաքացիների առանձնապես խոշոր չափերով գումարները և ձեռք բերել իրավունք նրանց անշարժ գույքի նկատմամբ։
Հիշեցնենք նաև, որ այս գործով անցնում են 7 տուժող, 18 վկա: Այս գործով վկայի կարգավիճակում են նաև Ներսիկ Նազարյանի որդին՝ Արմեն Նազարյանը, Կարեն Բաբակեխյանը, նրա որդին՝ Ռուբեն Բաբակեխյանը: Վերջիններից և ոչ ոք այսօրվա նիստին չէր ներկայացել, թեև պատշաճ ծանուցվել էին: Իսկ Գյումրու ոստիկանապետ Կարեն Բաբակեխյանի ծանուցումը վերադարձվել էր վերջինիս գտնվելու վայրը հայտնի չլինելու պատճառաբանությամբ: