«Բատկիվշչինա» խմբակցության ղեկավար Արսենի Յացենյուկը հայտարարում է, թե Ուկրաինայի նախագահ Վիկտոր Յանուկովիչը հայտարարել է ընդդիմության հետ բանակցություներ վարելու պատրաստակամության մասին, հայտնում է Interfax-ը:
«Նրանք հայտարարել են, որ պատրաստ են սկսել բանակցային գործընթացը»,- հայտնել է նա Մայդանի բեմից՝ նշելով, որ իրեն հենց նոր զանգել է Յանուկովիչը:
Յացենյուկը պնդում է, որ այդ բանակցությունների համար պատասխանատու է Ուկրաինայի ազգային անվտանգության ու պաշտպանության խորհրդի քարտուղար Անդրեյ Կլյուևը:
«Ես կասեմ ձեզ իմ տեսլականը:Առաջին հերթին՝ բանակցությունների մանդատը միայն Մայդանի մանդատն է: Երկրորդ՝ բացառապես հրապարակային բանակցություններ: Երրորդ՝ մեր բանակցությունները մեր պահանջների կատարումն են: Մենք պետք է ունենանք թափանցիկ ու հրապարակային քաղաքականություն: Մենք դրա համար ենք պայքարում ու նման քաղաքականություն ենք ստեղծելու երկրում», – հավելել է նա:
Յացենյուկի խոսքով՝ ներկայումս տեղի կունենան խորհրդակցություններ 3 ընդդիմադիր ուժերի միջև:
