Էրեբունի և Նուբարաշեն վարչական շրջանների ընդհանուր իրավասության դատարանում Արտուշ Գաբրիելյանի նախագահությամբ սկսվել է Նելլի Հ.-ի գործի դատավորությունը:
Ըստ մեղադրանքի՝ 36-ամյա Նելլին 2013 թվականի օգոստոսի 17-ին, ժամը 22-ի սահմաններում Երևանի թիվ 147 մանկապարտեզի բակում Նորայր Մ.-ի հետ գրկախառնվելու ընթացքում վերջինիս վերնաշապիկի ու տաբատի գրպանները պրպտել ու աննկատ հափշտակել է 30 հազար դրամ:
Բացի դրանից, 2013 թվականի հոկտեմբերի 26-ին, գիշերվա ժամը 2-ն անց 30-ի սահմաններում Երևանի Խորենացու փողոցում գործող «Գետառ» հյուրանոցային համալիրի սենյակներից մեկում 10 հազար դրամի դիմաց Սուրիկ Հ.-ի հետ սեռական հարաբերություն ունենալուց հետո Նելլին, օգտվելով Սուրիկի՝ քնած լինելու հանգամանքից, նրա տաբատի գրպանից վերցրել է ընդհանուրը՝ 754 հազար 20 դրամ՝ 59 հազար ՌԴ ռուբլի և 100 հազար ՀՀ դրամ: Գումարները վերցնելով՝ Նելլին սենյակից դիմել է փախուստի, բայց քնած Սուրիկը, լսելով դռան ձայնը, արթնացել, սենյակից դուրս է եկել ու բռնել փախչելու փորձ անող Նելլիին:
Նելլի Հ.-ին մեղադրանք է առաջադրվել գողության ու գողության փորձի համար՝ ՀՀ քրեական օրենսգրքի 177 հոդվածի 1-ին մասով և 34-177 հոդվածի 2-րդ մասի 2-րդ կետով: