2008 թ. Ռուսաստանը հանդես է գալիս որպես առաջնային միջնորդ ԼՂ հարցի կարգավորման բանակցային գործընթացում, և բոլոր հանդիպումները տեղի էին ունենում ՌԴ նախագահի հովանավորությամբ: Կազանյան հանդիպումից ռուսական կողմը մեծ ակնկալիքներ ուներ և ցանկանում էր վերջապես հաջողություն գրանցել, սակայն այդ ակնկալիքները չարդարացան, և այժմ, շատ փորձագետների կարծիքով, դա գնահատվում է որպես ռուսական դիվանագիտության ձախողում:
Ռազմավարական և ազգային հետազոտությունների հայկական կենտրոնի ղեկավար Մանվել Սարգսյանը, սակայն, այդ կարծիքին չէ: «Առաջին լրատվականի» հետ զրույցում Սարգսյանը նշեց, որ այստեղ Ռուսաստանի խնդիրը չէ. «Չեմ կարծում, որ ինչ-որ բան Ռուսաստանի դեմ էր արված: Ընդամենը ստեղծվել է մի իրավիճակ, որը ստիպում է փոխել մոտեցումներ»:
Հարցին, թե հնարավո՞ր է մոտեցման փոփոխության դեպքում փոխվի նաև Ռուսաստանի դերակատարությունը` Սարգսյանը պատասխանեց. «Դա արդեն կողմերի որոշելիք գործն է, եթե կողմերը նման ցանկություն չունեն, ապա դա բավականին դժվար է իրականացնել»: