Վերջերս ՀՀ ազգային վիճակագրական ծառայությունը հրապարակել է տվյալներ, թե նորածինների ծնողներն ինչ անուններով են նախընտրել անվանակոչել իրենց երեխաներին: Ըստ այդ տվյալների՝ 2013 թվականին ծնված աղջիկ երեխաներին ամենաշատը նախընտրել են անվանակոչել Նարե անունով, ընդհանուր առմամբ՝ 372 երեխա, երկրորդ տեղում Մարի անունն է՝ 285 երեխա, երրրորդ տեղում՝ Մանե՝ 269 երեխա: Հաջորդիվ գալիս են Միլենա, Անի, Անահիտ, Մարիամ, Մարիա, Էլեն անունները, տասնյակը եզրափակում է Աննա-ն:
Տղաների շրջանում նույն այս ժամանակահատվածում գերակշռել է Դավիթ անունը՝ 514 երեխա, երկրորդ տեղում է Նարեկ անունը՝ 451 երեխա, հետո՝ Գոռ՝ 272 երեխա, այնուհետև՝ Հայկ, Ալեքս, Արման, Տիգրան, Էրիկ, Սամվել, տասներորդ տեղում է Ալեն-ը:
Ընդ որում, 2013 թվականի հունվար-մայիս ամիսներին ծնվել է 7335 աղջիկ և 8528 տղա:
«Առաջին լրատվական»-ին ԱՎԾ-ից փոխանցեցին նաև, թե որ ազգանուններն են գերակշռել անցյալ տարի: Դրանք քիչ են զիջել 2012 թվականի տվյալներին, հիմնականում՝ Գրիգորյան, Հովհաննիսյան, Սարգսյան, Հարությունյան, Հակոբյան, Վարդանյան, Մկրտչյան:
