Ազգային ժողովի՝ ՀՀ ազգային անվտանգության ծառայության և Հատուկ քննչական ծառայության ղեկավարների հեռախոսազրույցի գաղտնալսման մանրամասները քննելու նպատակով ստեղծված ԱԺ քննիչ հանձնաժողովի նիստերը հնարավոր է անցկացվեն ամենօրյա ռեժիմով: Քննիչ հանձնաժողովի փակ նիստից հետո ԱԺ-ում լրագրողների հետ զրույցում այս մասին հայտնեց հանձնաժողովի նախագահ Գևորգ Կոստանյանը:
«Ամենօրյա ռեժիմով աշխատելու պարագայում կկարողանանք հնարավորինս արագ ձեռք բերել այն տեղեկություններն ու տվյալները, որոնք հնարավորություններ կտան ճիշտ հետևություններ անել»,- ասաց Կոստանյանը:
Նրա կարծիքով՝ իրենք պետք է շատ ինտենսիվ գործընթաց իրականացնեն, քանի որ դրա արդյունքը անհրաժեշտ է բոլորին՝ անկախ քաղաքական զարգացումներից:
Կոստանյանը նկատեց՝ կա անձանց շրջանակ, որոնք հրավիրման ենթակա են, բայց յուրաքանչյուր անձի հրավիրման հաջորդականությունը բխում է մեկի տրած տեղեկություններից: Նա հավելեց, որ նիստերը կհրավիրվեն մինչ դեկտեմբերի վերջ:
Դիտարկմանը, որ ԱԱԾ պետն արդեն ասել է, որ բացահայտվել է գաղտնալսման պատվիրատուն, Կոստանյանը նշեց, որ քրեական գործին ծանոթ չէ, Քննչական կոմիտեի գործի նկատմամբ ունի վստահություն, սակայն իրենց լիազորությունները կշարունակվեն:
2018 թվականի սեպտեմբերի 11-ին էլեկտրոնային լրատվության միջոցներում տարածվել է ՀՀ ազգային անվտանգության ծառայության տնօրեն Արթուր Վանեցյանի և ՀՀ հատուկ քննչական ծառայության պետ Սասուն Խաչատրյանի միջև տեղի ունեցած հեռախոսազրույցի ձայնագրությունը: