«Մամուլի հետ սուրճ» հաղորդման հոկտեմբերի 26-ի հյուրը հաղորդակցության փորձագետ Անուշ Բեղլոյանն է։
Անուշ Բեղլոյանը նշեց, որ այս վեց ամսվա ընթացքում բոլոր ակտիվ քաղաքական գործիչները հանդես եկան իրար հակասող հայտարարություններով և եթե նրանց ռեյտինգը որոշվեր որևէ սոցիոլոգիական հարցումով, ապա մենք հետաքրքիր տատանումների ականատեսը կլինեինք.«Ինչ վերաբերում է ընդդիմադիր կուսակցության ակտիվ գործիչներին, ապա եթե հիշենք, թե ինչ էին նրանք ասում վեց ամսի առաջ՝ ես որպես կուսակցության ղեկավար վստահ չէի լինի, որ նրանք ինձ համար կարող են ձայներ ապահովել։Ես համարում եմ, որ դա տվյալ իրավիճակում ողջամիտ մոտեցում է»,-ընդգծեց մեր զրուցակիցը՝ անդրադառնալով ԲՀԿ ցուցակի հնարավոր երիտասարդացման, նոր կադրերի ներգրավման մասին մամուլի հրապարակումներին։
Անուշ Բեղլոյանն անդրադարձավ նաև այն տեղեկություններին,թե իշխանության ներսում կան տարաձայնություններ.«Մենք չպետք է իշխանությունը դիտարկենք մեկ միասնական օրգանիզմ, որը մտածում, զարթնում ու քնում է նույն ժամին։ Մենք բոլորս մարդիկ ենք և իրարից տարբերվում ենք։ Եթե որևէ հարցում իշխանության ներսում կա բազմակարծություն՝ դա իշխանության առողջության նշանն է, այլ ոչ թե թերությունը»,-եզրափակեց նա։
