«Հայ երաժշտությունը ունի իր խնդիրները, և մենք մշտապես փնտրում ենք այն մարդուն, ով իրենով կհարստացնի հայկական երաժշտությունը։ Ստեղծագործողը նա չէ, ով կարող է ստեղծագործել, այլ նա, ով չի կարող չստեղծագործել»,- ասում է Ռոբերտ Ամիրխանյանը և նշում, որ իրական ստեղծագործողների պակաս կա հայկական ժամանակակից երաժշտության ոլորտում։
Կոմպոզիտորների միության նախագահ Ռոբերտ Ամիրխանյանը, ամփոփելով Հայ կոմպոզիտորական արվեստի փառատոնի գարնանային համերգաշարը, նշում է, որ դրա առաջնային ֆունկցիան հայ հասարակության մեջ հայկական երաժշտության համերգների գնալու ավանդույթ ձևավորելն է։
Ըստ բանախոսի՝ հայ երաժշտությունը պետք է ամեն օր հնչի, այլ ոչ թե միայն փառատոներին, սակայն փառատոնի անցկացումը կարևոր է, քանի որ պարտադրում է երաժիշտներին նվագել ոչ միայն եվրոպական երաժշտություն, այլև հայ հեղինակների գործեր։
Հայաստանի պետական երիտասարդական նվագախմբի կողմից անցկացվող փառատոնի շրջանակներում կայացել է 6 համերգ, փակումը տեղի է ունեցել երեկ։
Օգոստոսի 6-ին Հայկական երաժշտության փառատոն է անցկացվելու նաև Գերմանիայում։ Կոմիտասի անունը կրող այս փառատոնի բոլոր մասնակիցները պետք է նվագեն հայ կոմպոզիտորների և անպայման նաև Կոմիտասի ստեղծագործություններից։
