Երեկ Կահիրեում բախումներ են արձանագրվել երկրի նախկին նախագահ Հոսնի Մուբարաքի կողմնակիցների և հակառակորդների միջև, որի հետևանքով վիրավորվել են տասնյակ մարդիկ: Այս մասին հաղորդում է BBC-ն: Բախումները հնարավոր է եղել դադարեցնել միայն ուժայինների միջամտությունից հետո:
Եգիպտական MENA գործակալության հաղորդմամբ՝ ուրբաթ օրը մի խումբ ակտիվիստներ երթ են կազմակերպել ի պաշտպանություն Մուբարաքի, սակայն նրանց ճանապարհը փակել են նախկին նախագահի հակառակորդները: Եգիպտացիները մեկը մյուսի վրա քարեր են նետել, վնասվել են մի քանի մեքենաներ:
Տեղեկացնենք նաև, որ օգոստոսի 3-ին պետք է սկսվի Մուբարաքի դեմ դատաքննությունը: Սակայն հայտնի չէ, թե արդյոք Հոսնի Մուբարաքը կմասնակցի՞ դրան, քանի որ նրա առողջական վիճակը գնալով վատթարանում է. նրա մոտ քաղցկեղ է հայտնաբերվել:
