Երեկ Սիրիայում շարունակվել են բողոքի ակցիաները՝ գործող իշխանության հրաժարականի պահանջով: Ինչպես հաղորդում է «Ազատություն» ռադիոկայանը, հղում կատարելով ընդդիմադիրներին և իրավապաշտպաններին, ուրբաթօրյա բողոքի ակցիաների ժամանակ զոհվել է 15 մարդ:
Տասնյակ հազարավոր մարդիկ դուրս են եկել Սիրիայի քաղաքների փողոցներ՝ պահանջելով Բաշար Ալ-Ասադի հրաժարականը: Որոշ քաղաքներում անվտանգության ուժերը կրակ են բացել ցուցարարների վրա: Հաղորդվում է մի քանի սպանվածի մասին մայրաքաղաք Դամասկոսում և նրա արվարձաններում, Հոմսում և այլուր:
Լարված է իրավիճակը նաև երկրի հյուսիսային շրջաններում: Երեկ հաղորդվում էր, որ Թուրքիայի սահմանը հատած սիրիացի փախստականների թիվը գերազանցել է 12 հազարը: Նկատվում են զորքերի կուտակումներ թե՛ թուրքական սահմանում և թե՛ սիրիական կողմում: Երեկ անսպասելիորեն ամերիկյան CNN հեռուստաալիքը սկսել է ռեպորտաժներ վարել Սիրիայի մայրաքաղաքից: Մի քանի անգամ ամերիկյան հեռուստաընկերությանը մերժելուց հետո, Սիրիայի իշխանությունները թույլատրել են լրագրողների մուտքը երկիր:
