Ազգային անվտանգության հարցերով ԱՄՆ նախագահի նախկին խորհրդական Զբիգնև Բժեզինսկին ԱՄՆ սենատի արտաքին գործերի կոմիտեի լսումներին, որոնք նվիրված են Ուկրաինայում տիրող ճգնաժամին, հայտարարել է, որ Վաշինգտոնը, միջամտելով Կիևի ցույցերին, օգնում է նաև Ռուսաստանին՝ հաղորդում է BBC-ն:
Նրա խոսքերով՝ Ուկրաինային աջակցելը պատերազմ չէ Ռուսաստանի դեմ, այլ օգնություն վերջինիս՝ դառնալ նորմալ հետկայսերական երկիր:
«Ռուսաստանի եվրասիական նախագիծը չի լուծում նրա խնդիրները: Վաղ թե ուշ Ռուսաստանում ավտորիտարիզմը կտապալվի»,- իր հերթին ասել է նախագահի նախկին խորհրդական Ջիմի Քարթերը:
Միևնույն ժամանակ Բժեզինսկին հայտարարել է, որ ինքը դեմ է սառը պատերազմի մեթոդներին, իսկ ներկայիս Ռուսաստանը ԽՍՀՄ չէ:
Նա Ուկրաինայի ընդդիմության համար օրինակ է բերել Լեհաստանը: Բժեզինսկին Եվրոմայդանը համեմատել է «Համերաշխություն» շարժման հետ և ասել, որ Ուկրաինայի ընդդիմության առաջնորդները պետք է նվիրաբերեն իրենց ձգտումները և ընտրեն նախագահական ընտրությունների մեկ միասնական թեկնածու:
Նա հայտարարել է, որ ուկրաինացիներն արժանի են ապրել ինքնիշխան և եվրոպական Ուկրաինայում: Բժեզինսկին Ռուսաստանի նախագահին զգուշացրել է զերծ մնալ ուժային միջամտությունից Ուկրաինայի գործերին:
«Պուտինի փողերն ավարտվում են: Ամենայն հավանականությամբ, նա ստիպված կլինի երկարաձգել ճգնաժամի հետևանքները: Սահմաններ կան այն բանին, որով նա կարող է օգնել Յանուկովիչին»,- հավելել է Բժեզինսկին:
