Թուրքական Zaman օրաթերթն անդրադարձել է Թուրքիայում վերջին տարիներին նկատվող տնտեսական աճի պատճառով անօրինական աշխատող արտասահմանցիների թիվն աճին։ Ըստ պարբերականի` շատ հաճախ օտարերկրացիները համաձայնվում են աշխատել այդ երկրում նվազագույն աշխատավարձի կեսն ստանալով։
Թերթի տեղեկացմամբ` թուրքական կառավարությունը սահմանափակում է օտարերկրացիներին տրվող աշխատանքի արտոնության քանակը՝ նպաստելու համար Թուրքիայի քաղաքացիների զբաղվածության աճին, սակայն հակառակ դրան Թուրքիայում չի նվազում անօրինական աշխատող արտասահմանցիների թիվը։ Թուրքիայի ոստիկանությունը յուրաքանչյուր տարի ձերբակալում եւ արտաքսում է 60 հազար անօրինական աշխատող օտարերկրացիների, որոնց մի մասը կրկին վերադառնում է Թուրքիա։ Թերթի տեղեկություններով, Թուրքիայում անօրինական աշխատողները հիմնականում գալիս են Իրանից, Իրաքից, Ադրբեջանից, Հայաստանից, Ուկրաինայից, Բուլղարիայից, Չինաստանից եւ Ռումինիայից։ Աշխատանքի ոլորտը եւս տարբերվում է ըստ երկրների։ Օրինակ՝ Ուկրաինայից եւ Հայաստանից եկածները տներում երեխաներ են խնամում եւ տներում մաքրություն անում, իսկ չինացիներն աշխատում են հանքարդյունաբերության մեջ։