Սյունիքի մարզի ընդհանուր իրավասության դատարանում քննվել է Արթուր Միրզոյանի գործը:
46-ամյա Արթուր Միրզոյանին մեղադրանք էր առաջադրվել ՀՀ քրեական օրենսգրքի 242 հոդվածի 3-րդ մասով՝ 2 մարդու մահվան պատճառ դարձած վթարի համար:
Ըստ մեղադրանքի՝ 2017 թվականի մայիսի 4-ի առավոտյան, ժամը 9-ի սահմաններում Քաջարանի բնակիչ, Զանգեզուրի պղնձամոլիբդենային կոմբինատի վարորդ Արթուր Միրզոյանը, վարելով կոմբինատի հաշվեկշռում հաշվառված «Տոյոտա պրադո» մեքենան, Որոտան գյուղում կանգնել ու որպես ուղևոր վերցրել է քույր և եղբայր Դավիթին ու Աստղիկին, ովքեր մեքենայի էին սպասում: Դավիթի ու Աստղիկի՝ մեքենա նստելուց հետո Արթուր Միրզոյանը մեքենան դեպի Գորիս է վարել:
Հազիվ 200 մետր ընթանալով՝ Որոտան գյուղի վերջնամասում՝ Կապան-Գորիս ավտոճանապարհի 13-րդ կմ հատվածում՝ կամրջին չհասած՝ Արթուր Միրզոյանը, ըստ դատական ակտի, ուշադրությունը շեղել է երթևեկությունից՝ գործուղման թերթիկը հարմար տեղավորելու նպատակով:
Այդ ժամանակ նա, խախտելով ՃԵԿ համապատասխան պահանջները, դուրս է եկել երթևեկելի գոտուց, ճանապարհի ձախակողմյան ձորակով ընկել է Որոտան գետն ու գլխիվայր շրջվել է գետի միջով անցնող խողովակների վրա:
Րոպեներ առաջ այդ մեքենան նստած քույր ու եղբայր՝ 19-ամյա Աստղիկն ու 21-ամյա Դավիթը ստացած վնասվածքներից տեղում մահացել են: Նրանց մարմինները դուրս են բերվել փրկարարների օգնությամբ:
Դավիթը նոր էր զորացրվել բանակից, իսկ Աստղիկն ամուսնացած էր, մեկ երեխա ուներ…
Վարորդ Արթուր Միրզոյանը վթարի հետևանքով ստացել է մարմնական վնասվածքներ:
Առաջադրված մեղադրանքում Արթուր Միրզոյանն իրեն լիովին մեղավոր է ճանաչել, զղջացել է կատարվածի համար:
Տուժողների իրավահաջորդները նրան քաղհայցի պահանջ չեն ներկայացրել:
Դատարանը հաշվի է առել, որ Արթուր Միրզոյանը բնութագրվել է դրական, ԵԿՄ անդամ է, վատառողջ է, մասնակցել է Արցախյան պատերազմին, ստացել է պարգևներ, հանդիսանում է իր քրոջ անչափահաս դստեր խնամակալը:
Արթուր Միրզոյանը մեղավոր է ճանաչվել ՀՀ քրեական օրենսգրքի 242 հոդվածի 3-րդ մասով և դատապարտվել է 4 տարի 6 ամիս ազատազրկման՝ 2 տարով զրկվելով տրանսպորտային միջոցներ վարելու իրավունքից:
Պատժի սկիզբը՝ 2017 թվականի հունիսի 13-ից:
Դատավճիռը չի բողոքարկվել և մտել է օրինական ուժի մեջ:
