Ֆուտբոլի Հայաստանի ազգային հավաքականը գլխավորեց 51-ամյա մասնագետ Արմեն Գյուլբուդաղյանցը: Սեպտեմբերի 22-ին տեղի ունեցած ՀՖՖ նախագահի ընտրություններից հետո հայկական ֆուտբոլային գլխավոր կառույցի ղեկավարները արագացված ռեժիմով բանակցում էին մի շարք մասնագետների հետ: Հիշեցնենք, որ ազգային թիմի նախկին գլխավոր մարզիչ Վարդան Մինասյանը հրաժարական էր տվել ընտրություններից մեկ օր առաջ՝ սեպտեմբերի 21-ին: Երկու շաբաթում արտասահմանից բարձրակարգ մարզիչ հրավիրելը իսկապես անիրական էր թվում: Ավելի ստույգ՝ դժվար էր հավատալ, որ կգտնվի մի մարզիչ, ով ստեղծված իրավիճակում Հայաստանի հավաքականը վերակենդանացնելու պատասխանատվության երաշխիքներ կտար:
Հոկտեմբերի 13-ին մերոնք Երևանում Ազգերի լիգայի խաղարկության երրորդ տուրում մրցելու են Ջիբրալթարի հետ, որին հաղթելու դեպքում հոկտեմբերի 16-ին կրկին Երևանում կայանալիք Մակեդոնիայի հետ հանդիպումը ըստ էության կդառնա վճռորոշ փլեյ-օֆի համար պայքարում:
«Արմեն Գյուլբուդաղյանցն առաջին իսկ օրվանից եղել է թեկնածուների շարքում. ավելին՝ մենք նախնական համաձայնություն ենք ձեռք բերել պարոն Գյուլբուդաղյանցի հետ, որ նա ամեն դեպքում աշխատելու է ազգային հավաքականի շտաբում: Նա իրականացրել է մինչև հավաքն ընկած ժամանակահատվածում անհրաժեշտ գործողությունները՝ հրավիրել արտասահմանում հանդես եկող ֆուտբոլիստներին, հավաքի ծրագիր մշակել: ՀՖՖ-ն նաև բանակցել է մի շարք արտասահմանցի մարզիչների հետ, որոնցից երկուսը համաձայնել են Հայաստան ժամանել՝ ավելի սերտորեն բանակցելու և պայմաններին ծանոթանալու համար: Այդ մարզիչներն են եղել իտալացիներ Ջիանի դե Բիազին և Դելիո Ռոսսին: Նրանք նախապես իմացել են, որ մենք քննարկում ենք նաև այլ մարզիչների թեկնածություններ: Ծանոթանալով իրավիճակին, ուսումնասիրելով Հայաստանի հավաքականի մասնակցությամբ վերջին խաղերը՝ երկու մարզիչներն էլ եկել են այն եզրակացության, որ պատրաստ չեն մինչև գալիք հանդիպումները մնացած կարճ ժամանակահատվածում գլխավորել ազգային հավաքականը»,- ՀՖՖ պաշտոնական կայքի թղթակցի հետ զրույցում ասել է ՀՖՖ փոխնախագահ Արմեն Մելիքբեկյանը:
Նշենք, որ մինչ այս Գյուլբուդաղյանցը գլխավորում էր Հայաստանի երիտասարդական հավաքականը: Համաձայնելով գլխավորել մեր ազգային թիմը՝ Գյուլբուդաղյանցն ըստ էության մեծ պատասխանատվություն է վերցրել իր վրա:
Սթափ գնահատելով իրավիճակը՝ պետք է խոստովանենք, որ ստեղծված իրավիճակում Գյուլբուդաղյանցը այն բացառիկ մասնագետներից է, որը մոտ է կանգնած Հայաստանի ազգային հավաքականին և կարող է ֆուտբոլիստներին մղել պայքարի: Առաջիկա հանդիպումները Գյուլբուդաղյանցի համար կարող են դառնալ տրամպլին մարզչական կարիերայում լուրջ քայլ կատարելու համար: Գլուբուդաղյանցը բազմիցս վերապատրաստվել է եվրոպական գրանդ ակումբներում: Հատկապես տակտիկական տեսանկյունից այս մասնագետը բավական լավ է պատրաստված և շարունակ աշխատում է վարպետությունը բարելավելու համար:
Նշենք, սակայն, որ միջազգային ասպարեզում Գյուլբուդաղյանցի գլխավորած թիմերն ու տարբեր տարիքային հավաքականները լուրջ հաջողությունների չեն հասել: Այս տարի գլխավորելով «Փյունիկը»՝ Գյուլբուդաղյանցը կարճ ժամանակում կերպարանափոխեց թիմը: Սա կրկին խոսում է նրա տակտիկական պատրաստվածության մասին: Իսկ ազգային հավաքականն այն հարթությունն է, որտեղ գլխավորը հենց տակտիկական լուծումներն են:
Հաջողություն մաղթելով Արմեն Գյուլբուդաղյանցին՝ հուսանք, որ նրան կհաջողվի առաջիկա հանդիպումներում տոն պարգևել ֆուտբոլասերին:
Գյուլբուդաղյանցի նշանակումը բնականաբար ոչ միանշանակ արձագանք է ստացել երկրպագուների շարքերում: Բնական է, շատերը սպասում էին, որ Հայաստանի հավաքականը կստանձնի Եվրոպայում ճանաչում ունեցող մասնագետ, ինչպիսիք են, օրինակ, դե Բիազին կամ վան Մարվեյկը: Կարծում ենք՝ Հայաստանի հավաքականը կգլխավորեր այս «կալիբրի» մասնագետ, եթե հաջորդ հանդիպումն անցկացնեինք, ասենք, գալիք տարվա մարտին: Նշանակումից դժգոհ երկրպագուները խորը հիասթափություն կապրեին, եթե նույն դե Բիազիի գլխավորությամբ Հայաստանի հավաքականը Երևանում պարտվեր Մակեդոնիային և կորցներ հնարավորությունը փլեյ-օֆի ուղեգրի համար պայքարելու: Իսկ դրա հավանականությունը, կարծում ենք, մեծ կլիներ:
Հանգամանքների բերումով հիմա Արմեն Գյուլբուդաղյանցի ժամանակն է, և վստահ ենք, որ նա կանի հնարավորը Ազգերի լիգայում հաջողության հասնելու համար: Այս մրցաշարի խմբային փուլն ավարտվում է այս տարվա նոյեմբերին: Եկող տարվա մարտի վերջին էլ կմեկնարկի 2020 թվականի Եվրոպայի առաջնության ընտրական փուլը: Ազգերի լիգայի խաղարկությունում ձախողվելու դեպքում միայն կարելի կլինի մտածել բարձրակարգ օտարերկրացի մասնագետ հրավիրելու մասին: Այն ժամանակ ՀՖՖ-ն իսկապես բավարար ժամանակ կունենա պատշաճ կերպով մասնակցելու և ծանրակշիռ որոշում կայացնելու համար:
Հավատանք, սակայն, որ Գյուլբուդաղյանցի գլխավորությամբ մեր հավաքականը կկարողանա դուրս գալ Ազգերի լիգայի խաղարկության փլեյ-օֆ: Դե ուրեմն բարի երթ մաղթենք մերոնց:
