Քերին բարբարոսություն է անվանել Սիրիայի կառավարության կողմից իրականացվող ռմբակոծություններն ու սովը խաղաղ բնակիչների շարքում: Նրա խոսքով՝ Սիրիայում մարդասիրական աղետի մասշտաբները պահանջում են, որ ավելի մեծ ճնշում գործադրվի Ասադի վրա: Վերջինս ավելի վաղ խոստացել էր հասանելի դարձնել երկրում մարդասիրական օգնությունը: Այս մասին հայտնում է BBC-ն:
Պետքարտուղարի տվյալներով՝ 160 հազար խաղաղ բնակիչներ Դամասկոսի արվարձաններից մեկում մարդասիրական օգնություն չեն ստացել մոտ մեկ տարի: Քերիի խոսքով՝ այդ մարդիկ հայտնվել են պատանդի կարգավիճակում:
Քերին այս հայտարարություններն արել է Փարիզում հանդիպումից հետո, որի ընթացքում 11 երկրների («Սիրիայի բարեկամների» խումբ) արտգործնախարարները փորձել են համոզել Սիրիայի ընդդիմադիր և հեղափոխական ուժերի ազգային կոալիցիային մասնակցել հունվարի 22-ին Մոնտրյոյում կայանալիք խաղաղ բանակցություններին:
Քերին նշել է, որ այդ խաղաղ համաժողովն այլընտրանք չունի: Նրա խոսքով՝ բանակցությունները կլինեն «վստահության թեստ» ընդդիմության և Բաշար Ասադի ռեժիմի համար:
Նա վստահություն է հայտնել, որ Ազգային կոալիցիան կմասնակցի համաժողովին:
