Ադրբեջանական APA լրատվական գործակալության փոխանցմամբ՝ Վաշինգտոն կատարած այցի ժամանակ Թուրքիայի վարչապետ Ռեջեփ Թայիփ Էրդողանի արտաքին քաղաքականության գծով խորհրդական Իբրահիմ Քալընը, թուրք և ամերիկացի փորձագետների առջև ելույթ է ունեցել Մերձավոր Արևելքի ինստիտուտի ֆորումում։
Նա հայտարարել է, որ Թուրքիայի համար առաջնահերթ է համարվում Հարավային Կովկասի և հարևան տարածաշրջանների հակամարտությունների կարգավորումը.
«Թուրքիան հնարավոր ամեն բան «անում» է Հարավային Կովկասում երկարաժամկետ խաղաղության հաստատման համար։ Անկարան հուսով է, որ Հարավային Կովկասում դիվանագիտական ակտիվությունը կհանգեցնի ղարաբաղյան հակամարտության կարգավորման ուղղությամբ կոնկրետ առաջընթացին, ինչն էլ կնպաստի հայ-թուրքական հարաբերությունների կարգավորմանը»։
Ֆորումին ներկա են գտնվել նաև ԱՄՆ-ում Թուրքիայի դեսպան Նամըք Թանը, և ԱՄՆ պաշտպանության նախարարի օգնական Ալեքսանդր Վերշբոուն։ Վերջինս հայտարարել է, որ ԱՄՆ-ը շարունակելու է համագործակցել Թուրքիայի հետ և աջակցելու է Հարավային Կովկասում խաղաղության հաստատմանն ուղղված նրա ջանքերին.
«Մենք վճռականորեն աջակցում ենք հայ-թուրքական մերձեցմանը, ինչպես նաև տարածաշրջանում խաղաղության հաստատմանն ուղղված ջանքերին»։
Իբրահիմ Քալընն ընդգծել է, որ, թեև իշխող «Արդարություն և զարգացում» կուսակցությունը (ԱԶԿ) հունիսի 12-ին կայացած խորհրդարանական ընտրությունների արդյունքներով հավաքել է ընտրողների քվեների կեսը, սակայն, հարցումների համաձայն, ընտրողների 65-70 տոկոսն աջակցում է Թուրքիայի արտաքին քաղաքականությանը, որն առնչվում է Կովկասին, Մերձավոր Արևելքին, Հյուսիսային Աֆրիկային։