ԱՄՆ պետքարտուղար Հիլարի Քլինթոնը կոչ է արել Սիրիայի իշխանություններին հանել զորքերը Թուրքիային սահմանամերձ շրջաններից: Նրա խոսքերով՝ սիրիական զորքերի ներկայությունն այդ տարածքներում բացասաբար է ազդում փախստականների հետ կապված առանց այն էլ բարդ իրավիճակի վրա, ինչպես նաև վտանգ է ստեղծում Թուրքիայի հետ բախման մեջ մտնելու առումով: Այս մասին հաղորդում է Associated Press գործակալությունը:
Քլինթոնը շեշտել է, որ այս իրավիճակը դիտարկում է որպես կրիտիկական և լուրջ մտահոգություն առաջացնող: Նա համոզված է, որ սիրիացի զինվորականները պետք է անհապաղ դադարեցնեն «սադրանքները» տարածաշրջանում:
Հիշեցնենք, որ մարտի կեսերից երկրում սկսված հակակառավարական ցույցերը, որոնց կենտրոնը համարվում էր երկրի հարավը, այս ամսվա սկզբին տեղափոխվեցին հյուսիս։ Դրանց ժամանակ զոհվել են հարյուրավոր մարդիկ: Սիրիական բանակի գործողությունների հետևանքով ավելի քան 10 հազար մարդ փախել է Թուրքիա, իսկ երկրի հյուսիսային շրջանները դատարկվել են:
