«Մամուլի հետ սուրճ» հաղորդման սեպտեմբերի 28-ի հյուրը «Լրագրողների անկախ արհմիության» նախագահ Լևոն Սարդարյանն է։
Սարդարյանն անդրադարձավ «News.am» կայքի կողմից 1in.am կայքի լրագրող Սոնա Հարությունյանին ֆեյսբուքյան գրառման համար դատի տալու փաստին և նշեց. «Ինձ համար դա անընդունելի գործելաոճ է։ Ինքս էլ բազմիցս բախվել եմ այդ խնդիրներին, երբ իմ անձի կամ իմ մերձավոր շրջապատի հետ կապված գրառումներ են արել նաև լրագրողներ, բայց ես երբեք ինձ թույլ չեմ տվել խնդիրը լուծել նման եղանակով ՝ շատ պարզ պատճառով. նախ՝ դա նախադեպ կստեղծեր, երբ լրագրողը լրագրողի դեմ դատական հայց է ներկայացնում»։
Ինչ վերաբերում է վերջին շրջանում Քոչարյանի, նրա որդու կողմից տարբեր պաշտոնյաներին, գործիչներին դատի տալու հանգամանքին, Լևոն Սարդարյանը պատասխանեց. «Ես առհասարակ չեմ հասկանում ակնհայտը մերժելու տրամաբանությունը, կա նման բան, դու, միևնույն է, մերժում ես։ Դրանով դու հիմք ես տալիս չվստահելու քո հետագա հրապարակումներին, խոսքերին։ Բա որ ապացուցվեց, հետո՞»։