Սեպտեմբերի 25-ին Նյու Յորքում վարչապետ Նիկոլ Փաշինյանը ՄԱԿ-ի Գլխավոր ասամբլեայի շրջանակներում հանդիպում է ունեցել Իրանի նախագահ Հասան Ռոհանիի հետ: Կողմերը քննարկել են հայ-իրանական հարաբերությունների օրակարգային տարբեր հարցեր՝ կարևորելով տնտեսական համագործակցության զարգացումը: Թեմայի շուրջ «Առաջին լրատվական»-ը զրուցել է իրանագետ, Միջազգային և անվտանգության հարցերի հայկական ինստիտուտի փորձագետ Արմեն Վարդանյանի հետ:
«Այս հանդիպումը պետք է լիներ, այստեղ ամեն ինչ օրինաչափ է, և Ռոհանի-Փաշինյան հանդիպումը վաղուց էր պլանավորած: Կարևոր էր, որ Ռոհանին Հայաստանի վարչապետին Իրան այցելելու պաշտոնական հրավեր ուղղեց, քանի որ արդեն երկար ժամանակ քննարկվում էր վարչապետի այցն Իրան: Չգիտեմ՝ ինչ պատճառներով, բայց այն չէր կայանում»,- ասաց Վարդանյանը՝ անդրադառնալով այն հարցին, թե ինչու հայկական կողմը մինչ օրս չունի Թեհրան պաշտոնական այցի օրակարգ:
Մեր զրուցակցի դիտարկմամբ՝ հայ-իրանական համագործակցության հետագա հիմքը դրվեց Նյու Յորքում՝ Փաշինյանի և Ռոհանիի հանդիպմամբ:
Այն հարցին, թե ինչ կարևոր հարցեր են քննարկել Հայաստանի վարչապետը և Իրանի նախագահը, Վարդանյանն ասաց. «Դատելով հաղորդագրությունից՝ քննարկման հիմնական թեման եղել է երկկողմ տնտեսական կապերի ամրապնդումը: Ինչպես իրավացիորեն նշված է պաշտոնական հաղորդագրությունում, երկու երկրների քաղաքական հարաբերությունները բարձր մակարդակի վրա են գտնվում, մենք ուրևէ լուրջ խնդիր, տարաձայնություն չունենք Իրանի հետ: Բայց երկկողմ տնտեսական կապերը համաչափ չեն տնտեսական կապերին: Երկու երկրների միջև ապրանքաշրջանառությունն ընդամենը 290 միլիոն դոլարի կարգի է, որը չափազանց քիչ է նման կարգի բարձր քաղաքական հարաբերություններ ունեցող երկրների համար:
Բնականաբար, երկու կողմն էլ հասկանում է, որ պետք է ամեն ինչ անել հայ-իրանական տնտեսական կապերն ամրապնդելու համար»:
Առավել մանրամասն՝ տեսանյութում: