Հայաստանում հեղափոխությունից հետո տեղի ունեցածը ԵՄ-ն համարում է մի նոր հնարավորության դուռ՝ արդարադատության կառույցների, անկախ, արդար դատական համակարգ ստեղծելու համար:
Հայաստանում ԵՄ պատվիրակության ղեկավար, դեսպան Պյոտր Սվիտալսկին նման տեսակետ հայտնեց «ՀՀ արդարադատության ոլորտի բարեփոխումների շրջանակում ՀՀ-ԵՄ ռազմավարական քաղաքականության երկխոսություն» խորագրով աշխատաժողովում:
«ԵՄ-ն տարիներ շարունակ ավելի քան 50 մլն եվրոյի ներդրումներ է կատարել՝ նպաստելու, որ Հայաստանի արդարադատության համակարգն ավելի արդյունավետ կերպով գործի: ԵՄ-ն նպաստել է ստեղծելու կամ վերանորոգելու բազմաթիվ դատարաններ: Մեծ ներդրումներ ենք ունեցել Արմավիրի քրեակատարողական հիմնարկում: Այսօր Հայաստանում հեղափոխությունից հետո մի նոր էջ է բացվում: Տեղի ունեցածը մենք համարում ենք մի նոր պատուհան, մի նոր հնարավորության դուռ հայկական կառույցների համար՝ ստեղծելու արդար, անկախ և արդյունավետ արդարադատության համակարգ»,-ասաց Սվիտալսկին:
Դեսպանը նշեց՝ իրենք Հայաստանին իրենց պատրաստակամությունն են հայտնել անկախ և արդար դատական համակարգի ստեղծման գործում հավելյալ ջանքերի, օժանդակության համար: Սվիտալսկին նկատեց՝ Հայաստանի կառավարության համար դատական համակարգի անկախությունը գերակա ճյուղ է: Նա դա կարևոր համարեց կառավարության՝ իր առջև դրված մի շարք առաջնահերթություններից: «Կառավարությունն, անշուշտ, ևս նկատել է, որ ամենի սկիզբը պետք է լինի արդարադատության համակարգի անկախությունը: Վարչապետն անձամբ է ասել, որ երդվում է՝ երբեք ոչ մի դատավորի զանգ չկատարել»,-նկատեց դեսպանը:
ԵՄ փորձագետները Հայաստան այցի ընթացքում նկատել են՝ պետք է շարունակել հակակոռուպցիոն պայքարը: Սա ևս ՀՀ կառավարության առաջնահերթություններից է: Սվիտալսկին նկատեց՝ այստեղ կառավարության և դատական համակարգի առաջնահերթությունները համընկնում են: Դեսպանը նշեց՝ դատական համակարգը պետք է լիովին ազատ լինի կոռուպցիայի ցանկացած տեսակից: Դրա համար պետք է քայլեր ձեռնարկվեն: Հարկավոր են նաև կանխարգելիչ միջոցառումներ:
Սվիտալսկին ևս մեկ անգամ վերահաստատեց՝ արդարադատության համակարգի զարգացման գործում Հայաստանին օժանդակելու պատրաստակամությունը:
