Կիևում «Բերկուտի» ջարդարարների հետ բախումներից հետո հոսպիտալացվել է «Ուկրաինական երրորդ հանրապետություն» շարժման առաջնորդ, Ուկրաինայի ՆԳ նախկին նախարար Յուրի Լուցենկոն՝ հաղորդում է «Ուկրաինսկայա պրավդա»-ն:
Լուցենկոյի մոտ ախտորոշվել է գլխի վնասվածք: Դեպքի վայրում արված լուսանկարներում քաղաքական գործչի դեմքը արյունոտ է: Հիվանդանոցում կատարում են գլխի տոմոգրաֆիա, բժիշկները կասկածում են ուղեղի ցնցում:
Լուցենկոյի կնոջ՝ Իրինայի խոսքերով՝ հունվարի 10-ի լույս 11-ի գիշերը Լուցենկոն ՆԳ Սվյատոշինսկու շրջանային բաժանմունքի մոտ էր, որտեղ հավաքված էր ակտիվիստների և «Բերկուտի» ջարդարարների մեծ քանակություն: Լուցենկոն փորձել է կանգնել հատուկ ջոկատայինների և ցուցարարների միջև, որից հետո, նրա կնոջ պնդմամբ, «բերկուտցիները» սկսել են հարվածել նրա գլխին: Իրինա Լուցենկոյի խոսքերով՝ կոտրել են ամուսնու ակնոցը, նա ընկել է և կորցրել գիտակցությունը:
