Դեկտեմբերին Մոսկվայում կայացած` պետությունների ղեկավարների մակարդակով Եվրասիական տնտեսական գերագույն խորհրդի նիստի բանակցությունների ընթացքում Ղազախստանն ու Բելառուսն իրենց նախապայմանները ներկայացրին ՄՄ-ի վերաբերյալ: Ռուսական մի շարք առաջատար լրատվամիջոցների կանխատեսմամբ` 2014 թ. նախատեսվող բանակցությունները չեն խոստանում պարզ լինել, քանի որ և՛ Բելառուսը, և՛ Ղազախստանը կարծում են, որ ինքնիշխան լիազորությունների փոխանցումը ՄՄ-ին անհնար է, միության կոմպետենտությունը պետք է հստակեցնել, ինչը հակասում է Ռուսաստանի տեսլականին:
«Առաջին լրատվական»-ի հետ զրույցում ՀՀ-ՄՄ անդամ պետությունների բանակցություններին և ՄՄ-ի ներսում առկա խնդիրներին, հակասություններին անդրադարձավ ՌԴ Պետդումայի պատգամավոր, տարածաշրջանային քաղաքականության Դումայի հանձնաժողովի նախագահի առաջին տեղակալ, Լիբերալ-դեմոկրատական կուսակցության անդամ Ռոման Խուդյակովը: Նրա պնդմամբ՝ այդ քննարկումներն ամենևին էլ հակասություններ չեն ՄՄ անդամ երկրների միջև, այլ բնական աշխատանքային գործընթաց: Պետդումայի ներկայացուցչի կարծիքով՝ շատ ավելի վատ կլիներ, եթե նման քննարկումներ չանցկացվեին, որն էլ կնշանակեր, որ ոչ մի ինտեգրացիա գոյություն չունի, և այն, ինչ տեղի է ունենում, քաղաքական PR է:
«Բայց միավորման վերաբերյալ մեր դիրքերն ամենահստակն են և երկրներն իրապես ընտրում են իրենց զարգացման ուղին: Լիովին բնական է, որ ներկայումս ՄՄ անդամ երկրների ղեկավարները պետք է քննարկեն ամեն ինչ՝ մինչև դետալներ, ինչպես նաև հետագայում բացասական հետևանքներից խուսափելու նպատակով: ԵՄ-ին անհրաժեշտ եղան տասնյակ տարիներ այդ քննարկումների համար, որպեսզի ընդհանուր կոնսենսուս ձևավորվի: Մենք ավելի արդյունավետ ենք աշխատում»,- տեսակետ հայտնեց Ռոման Խուդյակովը:
Ինչ վերաբերում է ՄՄ-ում ԼՂ կարգավիճակին ու Ղազախստանի նախագահ Նուրսուլթան Նազարբաևի վերապահումներին, ՌԴ Պետդումայի պատգամավորն ասաց՝ կարևոր է հաշվի առնել, որ ՄՄ-ն առաջին հերթին տնտեսական միություն է: Ուստի, ըստ Խուդյակովի, Հայաստանի ինտեգրացիայի որոշումն ընդունվելու է գրագետ կազմված տնտեսական հիմքի վրա:
«Այդ պատճառով էլ ԼՂ հարցն անհետաձգելի է, բայց՝ ոչ որոշիչ: ԼՂ-ին հատուկ կարգավիճակ տրամադրելու գաղափարը հետաքրքիր է: Ինչպես Ձեզ հայտնի է, կուսակցությունը սատարում է ժողովուրդների ինքնորոշման գաղափարը, իհարկե եթե այն տեղի է ունենում խաղաղ ճանապարհով»,- նշեց նա:
